O sábado, o equipo xogará o seu primeiro amigable de pretemporada
26 ago 2025 . Actualizado á 05:00 h.O Club Ourense Baloncesto avanza na súa pretemporada e encara a súa segunda semana oficial de preparación, que desembocará no primeiro amigable o sábado contra o Zamora no pavillón da Chaira do Pereiro de Aguiar.
O traballo avanza aínda que aínda faltan por chegar tres dos xogadores que serán teoricamente titulares no cinco inicial de Moncho López. Rafa Lisboa, o base portugués, atópase coa súa selección, do mesmo xeito que a á-pivot Kwentan Smith está co equipo nacional de Bahamas. Estes dous están fichados, pero non se incorporarán ata o mes de setembro xa que estarán no Eurobasket e na America Cup. Smith anotou sete puntos para Bahamas fronte a Brasil (66-84).
Ademais destes internacionais, o club está preto de pechar un pivote. Ten dúas opcións bastante adiantadas, aínda que se a oferta lanzada a un primeiro xogador prospera, este sería o elixido. O perfil que se busca é o dun cinco, un center forte, con experiencia en Europa e que, preferiblemente coñeza a liga española. Se as negociacións frutifican, o pivote do COB podería asinarse esta semana para ter o equipo xa completo.