O equipo de Borja Fernández cedeu 1-0 no Memorial Club Deportivo Ourense
22 ago 2025 . Actualizado á 10:27 h.Nova entrega do Memorial CD Ourense, que enfrontou á VDE Ourense e ao CD Lugo. E fíxoo nun campo da Pinguela (Monforte) bastante irregular. A igualdade foi a tónica dominante nos primeiros compases do encontro, pero a medida que foron pasando os minutos, o Lugo fíxose co control do encontro. A escuadra de Yago Iglesias xerou perigo sobre todo pola banda dun Lago Júnior, que, sen dúbida, foi o mellor dos lucenses.
De feito, a primeira grande ocasión naceu das súas botas. Júnior foise por velocidade pola banda e a súa asistencia rematouna chegando desde a segunda liña Txus Alba. O remate foise alto. Foi no minuto 24, e tres minutos despois tivo outra ocasión o Lugo cun remate de Amo tras un saque de esquina.
Foron os momentos nos que máis perigo xerou o Lugo, que volveu gozar doutra ocasión por medio de Lago Júnior. A partir do minuto 30 estirouse un pouco máis a VDE Ourense, e así chegou un remate de Parrilla, que tras unha grande intervención desbaratou Marc Martínez. A esta acción respondeu o Lago Júnior cun disparo con rosca tras unha xogada individual, que se foi desviado. A partir dese instante e ata o final da primeira entrega xa non houbo ocasións claras. Iso si, os albivermellos volveron tomar o control do encontro. No descanso, Yago Iglesias moveu o banco. E no minuto 50 chegou o primeiro e único gol do partido. Jorge González, moi activo, roubou un balón na frontal da área e asistiu a Unzueta, que bateu ao meta da VDE Ourense. Nesta entrega, o partido nivelouse e a VDE Ourense foi máis atrevida. De feito, Manu Núñez tivo o empate. Incluso co tempo cumprido puido marcar, pero o marcador non se moveu. O Lugo alzouse finalmente co Memorial CD Ourense.
?
Marc Martínez; Iago López, Gayá, Amo, Cabalo; Álex Carbonell, Txus Alba, Celorio, Samanes; Lago Júnior e Unzueta. Tamén xogaron Jorge González, David Rosón, Arao Camala, Nico Reniero, Ibaider, Jon Merino, Kevin Presa, Trigueros e Nathaniel.
?
Vizoso; Puime, Labrada, Varo, Santi Prado; Parrilla, Manu Núñez, Justino, Jaichenco; Migui e Gamarra. Tamén xogaron Rielo, Noel, Samu Pardo, Roi Currás, Viti, Champi e Mauro.
GOLES: 1-0, min 50, Iker Unzueta.