O Concello do Carballiño abriu o prazo para participar na actividade
12 jul 2025 . Actualizado á 05:00 h.O Concello do Carballiño abriu o prazo para participar no tradicional concurso de deseño de camisetas con motivo da Festa do Polbo, que este ano estará dedicada a Italia como país invitado. O certame busca fomentar a creatividade e a implicación da cidadanía, especialmente da mocidade, nun dos eventos máis emblemáticos do municipio. Os deseños deberán inspirarse na Festa do Polbo e na cultura italiana, e poderán incluír debuxos, imaxes, palabras, frases, números ou calquera outro elemento gráfico.
As propostas poderanse aplicar sobre camisetas de calquera cor, tanto na parte dianteira como na traseira. O concurso está dirixido a todo tipo de colectivos —asociacións xuvenís, culturais, veciñais, grupos informais, centros educativos ou cuadrillas de amigos— sen límite de idade, sempre que a persoa responsable do grupo sexa maior. Cada agrupación poderá presentar un único deseño. Concederanse tres premios principais: un primeiro premio de 300 euros, un segundo de 200 e un terceiro de 100. Ademais, todos os deseños que cumpran os requisitos establecidos nas bases recibirán unha compensación de 60 euros.