Informan os profesionais de como reaccionar en caso de agresión
26 jun 2025 . Actualizado á 05:00 h.«Hai que denunciar». Esta foi a frase máis repetida este mércores no Hospital de Verín, onde se celebrou unha xornada de prevención da violencia co Interlocutor Policial Sanitario, organizada polo Sergas como parte da súa estratexia para mellorar a resposta institucional ante as agresións a profesionais sanitarios. José Benito Fernández Santamarina, comandante da Garda Civil e interlocutor policial sanitario do distrito de Verín, presidiu a charla, á que acudiron axentes da comandancia verinesa, así como María Lúgaro Seco, de Recursos Humanos da área sanitaria de Ourense, Verín e Valdeorras, e a dirección do hospital.
O interlocutor policial sanitario é unha figura de referencia para os profesionais do sector, promovida polo Ministerio do Interior. O seu obxectivo é asesorar en materia preventiva e de formación para evitar situacións de risco. A través da denuncia e da colaboración entre administracións, búscase mellorar a seguridade do persoal e reducir a impunidade destas condutas.
«Nós aplicamos o protocolo cero na violencia de xénero. Iso significa que ás veces a vítima non denuncia e nós facémolo de oficio. Este non é o caso, por iso ímosvos a pedir que, por favor, denunciedes». Deste xeito dirixiuse José Benito Fernández Santamarina aos sanitarios presentes na sala, sinalando que é o único xeito de frear aos reincidentes. Recriminoulles, neste punto, que só dan parte do 5% das agresións que sofren e explicou, para a tranquilidade dos presentes, que os corpos de seguridade realizan servizos preventivos diarios polos hospitais e centros de saúde: «Aínda que ás veces non nos vedes, estamos».
Precisamente este mércores, antes do relatorio, instalouse unha mesa informativa á entrada do hospital coa presenza de varios gardas civís, para que a sociedade en xeral saiba que eles preveñen e actúan sobre as condutas agresivas. Tamén se repartiron trípticos que explican como intervir e a quen avisar ante calquera caso de violencia.
No encontro tamén participou Roberto Valente, enxeñeiro informático da Garda Civil, que puxo en evidencia os ataques que reciben os sanitarios a través das redes sociais, sinalando a posibilidade de que Google poida discriminar algunhas das reseñas. Subliñou as diferenzas entre un insulto ou unha discusión e unha intimidación. Este último feito, dixo, é o denunciable, como se recolle no Código Penal.
«Non podedes traballar con medo. Denunciade. Hai que pór en coñecemento estes casos, non só por vós, senón polos que veñan detrás», sinalou Valente. Explicou que o 51% dos casos de ameazas e coaccións sófrenos as mulleres, que proveñen na súa maioría de familiares dos pacientes e que se dan con máis frecuencia en Urxencias e nos PAC durante as fins de semana.
Durante a xornada tamén se abordou o uso de Acude, unha plataforma tecnolóxica que permite aos profesionais sanitarios xerar unha alerta ante unha situación de risco de violencia desde o seu propio computador ou dispositivo móbil, independentemente da súa localización física ou do tipo de actividade asistencial que estean a desenvolver. Esta ferramenta foi pilotada inicialmente no Hospital Universitario de Ourense antes de estenderse ao conxunto do Sergas. Presentáronse as utilidades da aplicación móbil Alertcops, que permite alertar ás forzas de seguridade ante situacións de risco. Conta cun botón «SOS» específico para profesionais da saúde, que conecta directamente coas autoridades e permite unha intervención rápida. Durante o encontro destacáronse os beneficios que traerá a futura lei contra as agresións ao persoal da sanidade, con multas de 300 a 15.000 euros.