Será unha renovación total, con novo firme, beirarrúas e carril bici
04 jun 2025 . Actualizado á 05:00 h.Despois de varios anos de espera e dunha longa tramitación, o luns 16 de xuño comezarán as obras para transformar a travesía da N-525 en Xinzo de Limia, as avenidas de Ourense e de Madrid, nunha rúa máis humanizada e adaptada aos peóns. Os traballos, que teñen un presuposto de máis de catro millóns de euros, e un prazo de execución de doce meses, están promovidos polo Ministerio de Transportes e fináncianse con fondos da Unión Europea dentro do Plan de Recuperación, Transformación e Resiliencia. «É unha gran nova e agradecemos ao Goberno de España a súa implicación con Xinzo», declarou o alcalde, Amador Díaz, ao anunciar o inicio das obras xunto co subdelegado do Goberno, Eladio Santos, que realizou unha visita institucional ao Concello. O proxecto inclúe a renovación integral do firme, a creación de beirarrúas e de carrís bici, zonas axardinadas, plataformas elevadas nos pasos de peóns e outras melloras de accesibilidade.
Subida ao Seminario
Doutra banda, a Xunta anunciou onte a licitación de melloras en trece travesías urbanas en Ourense entre elas a subida ao Seminario (OU-413), na que se realizará unha «rehabilitación integral», cun investimento dun millón de euros. En total, a Consellería de Vivenda e Planificación de Infraestruturas gastará 2,8 millóns de euros nestas actuacións nos viais da súa titularidade. As intervencións serán nas rúas Peña Trevinca, río Arnoia, Sáenz Díez, Progreso, avenida de Buenos Aires, Emilia Pardo Bazán, Isaac Piñeiro Varela, Velázquez, Ponferrada, Bispo Lourenzo, avenida de Zamora e Coruña.
O Ministerio de Transportes vai realizar unha renovación do asfaltado da travesía da OU-541 no seu tramo interurbano, no Carballiño. Se fresará a capa de rodaxe e substituirase por un novo aglomerado asfáltico desde a rotonda da Casa Azul ata a do acceso á AG-54. Colocaranse sinais luminosos do paso de peóns á altura do restaurante Fuchela e pintará un novo onde o Mercadona. O Concello do Carballiño executará unha nova canalización enterrando cables e dotará de novos semáforos a Catro Camiños.