A Garda Civil insignia en San Cibrao estratexias para previr ciberataques e accidentes laborais de tráfico

A Asociación de Empresarios Polígono San Cibrao organizou este martes unha ponencia sobre seguridade integral na que expertos da Garda Civil compartiron estratexias para protexer a información e os sistemas fronte a ameazas cibernéticas e para reducir os riscos relacionados cos desprazamentos.

Efrén Varón, do Equipo@ourense e Alfonso Limia, do Equipo de Investigación Tecnolóxica (EDITE), compartiron cos empresarios nocións sobre o uso seguro do correo electrónico, a identificación de virus ou a xestión de claves. Ademais, dado que os sinistros de tráfico teñen un importante impacto na sinistralidade laboral, durante a xornada tamén se trataron medidas preventivas e recomendacións para reducir os riscos de accidentes laborais na estrada.

Juan Carlos Nogueiras, tenente de Tráfico da Garda Civil de Ourense, encargouse de detallar o plan de mobilidade segura na empresa. O experto compartiu como mellorar a xestión da seguridade viaria no ámbito empresarial co fin de reducir, tanto os riscos relacionados cos desprazamentos «in itinere», como os que se producen dentro da xornada laboral no desempeño por parte das persoas traballadoras das súas funcións.

O presidente da Asociación de Empresarios Polígono San Cibrao, José Antonio Rodríguez Araujo, puxo en valor este relatorio e este tipo de iniciativas que pretenden instruír aos empresarios en materia de prevención: «É crucial que os empresarios nos impliquemos neste tipo de xornadas, xa que só traballando xuntos poderemos crear unha contorna máis segura e eficiente».

---

---

---