O grupo nacionalista de Ourense tamén reclama que se volvan a colocar no estadio do Couto os monumentos ao club e a Lito
10 jun 2024 . Actualizado á 05:00 h.O BNG solicita a restitución no estadio do Couto dos monumentos homenaxe a José Manuel Vieira Ferreira Lito e a CD Ourense, que foron retirados durante as obras de reforma. «Lito foi un xogador emblemático, que se gañou o cariño da afección e que ben merece ten o seu recoñecemento», destaca Luís Seara, portavoz dos nacionalistas. Desde o partido admiten que a nova colocación dos monumentos é unha decisión que lle corresponde á Xunta. «Máis entendemos que o Concello, a través do CMD, ten que ter a capacidade de interpelar ao Goberno galego», afirma Seara, que lembra: «Os símbolos coma estes teñen a importancia de lembrar e recoñecer traxectorias ou acontecementos, son unha maneira de divulgar a nosa historia».
O grupo nacionalista insiste tamén na necesidade dun museo para o CD Ourense. «É importante que os trofeos do clube estean a disposición da veciñanza pois tamén son parte da historia da cidade», afirma Seara. O BNG solicitou xa no 2021 que se tivese en conta a súa petición e instalásese un espazo expositivo no estadio, que estivese incluído dentro da reforma. «A sala será unha forma de pór en valor o legado deportivo do Club Deportivo Ourense. Imos promover a petición en todas as institucións implicadas», remata o portavoz.