A Consellería de Comercio dotou con 2,5 millóns de euros esta quinta campaña e os descontos están activos ata que se esgote ese importe total
29 abr 2024 . Actualizado á 20:54 h.En apenas catro días, desde o venres 26 de abril, descargáronse 300.000 bonos da campaña Bono Activa Comercio da Xunta de Galicia, segundo datos da Consellería de Emprego e Comercio. O titular deste departamento, José González, visitou este luns dous establecementos ourensáns da rúa Xoán XXIII que están adheridos á campaña, que chega á súa quinta edición.
González subliñou que esta iniciativa da consellería ten un presuposto de 2,5 millóns de euros e pretende mobilizar doce millóns de euros en vendas no pequeno comercio. Esta edición da campaña incide, ademais, na fidelización e na apertura a novos clientes. En Galicia son 6.500 os comercios adheridos á campaña e en Ourense, un milleiro. O conselleiro apuntou que o éxito da iniciativa se demostra no número de descargas e no de establecementos que participan. Os negocios que estean interesados en sumarse aínda poden facelo ata o 1 de setembro.Os consumidores que se descarguen os bonos na web www.bonosactivacomercio.gal poden gozar de descontos de ata trinta euros nas súas compras nos negocios adheridos.
Descárganse en formato QR. O importe vaise reducindo segundo o valor da compra. Por exemplo, para bienes que custen entre vinte e trinta euros, o desconto é de cinco euros. Se o gasto vai de trinta a cincuenta euros, co bono redúcense dez euros. Só se pode descargar un bono por persoa, aínda que non hai límite de usuarios. Cando se esgoten os 2,5 millóns do presuposto dotado, os bonos xa non serán válidos.
O conselleiro destacou a importancia do comercio para xerar emprego e dinamizar as economías locais. Avanzou que nesta lexislatura desde o seu departamento fixaranse no sector retallista e na súa dixitalización. Anunciou que a Xunta está a preparar o Plan Remuda, para axudar a garantir a continuidade nos negocios, pondo en contacto ás persoas que os queren deixar cos interesados en retomalos. En datas próximas, o Goberno sacará un Bono Remuda,con axudas para quen queira facerse cargo de negocios en risco de peche.