O carreiro, discorre entre vexetación de ribeira e por unha paisaxe con afloramentos rochosos que enmarca as ondas que forma o río nos montes de Puxedo, Guende e A Cela, en Lobios
19 abr 2024 . Actualizado ás 05:00 h.A Federación Galega de Montañismo deu o visto e prace á homologación da ruta de sendeirismo das Ondas, que percorre o monte comunal de Puxedo, Guende e A Cela, no municipio de Lobios. Foi catalogada como o carreiro número PRG-268. É unha ruta circular de 6,7 quilómetros de lonxitude, de dificultade media e case na súa totalidade discorre polo parque natural Baixa Limia-Serra do Xurés. Percorrela leva unhas dúas horas. É a única ruta homologada pola federación no concello de Lobios .
Comeza na praza de san Antonio de Puxedo e diríxese cara ao norte, entre carballeiras, ata o río Mao. O primeiro tramo do carreiro discorre paralelo ao río e pódense visitar seis muíños de auga restaurados. Na ponte da estrada OU-1206 a ruta bifúrcase. Entón o tipo de paisaxe é xa totalmente diferente, xa apenas hai vexetación arbórea e os afloramento rochosos e o curso do río, con remansos, fervenzas e as "ondas de xigante" -grandes concavidades provocadas pola erosión fluvial- son os elementos máis destacados. Tras a fervenza do Cal crúzase por unha ponte de madeira e iníciase o regreso polo outro marxe do río para volver á aldea de Puxedo.
En Albite, a un par de quilómetros da ruta, a Federación Galega de Montañismo dispón dun albergue con capacidade para 50 persoas.
A restauración dos muíños e a creación desta ruta para dar a coñecer a beleza do río Mao é froito do traballo da comunidade de montes e da Asociación de Veciños Amigos do Río Mao. Nos últimos anos promoveron moitos tratamentos silvícolas e a recuperación da flora autóctona de ribeira; no ámbito patrimonial lograron a recuperación de seis muíños antigos, postos en valor con esta ruta, un miradoiro e unha pasarela de madeira. Tamén acondicionaron tres áreas recreativas. As actuacións supuxeron un investimento de 150.000 euros, financiados con diversas axudas da Consellería de Medio Ambiente. Dentro desta estratexia, a asociación e a comunidade de montes preparan máis proxectos de futuro, como un aparcadoiro disuasorio para os bañistas que acoden ás pozas no verán, continuar coa recuperación ambiental dos bosques de ribeira e restaurar máis muíños.