Esta peza única de arte popular do século XVIII necesita ser restaurada
27 mares 2024 . Actualizado ás 17:31 h.O denominado Monumento de Semana Santa de Beade levaba máis de trinta anos gardado. Esta instalación do século XVIII, que durante anos se colocaba na igrexa de Santa María durante estas datas, gardouse fai tres décadas polo mal estado no que se atopaba, á espera da súa recuperación. Chegou mesmo a sobrevivir á bomba que se colocou na casa consistorial fai dez anos, onde estaba gardada. Tras o atentado, as madeiras custodiáronse na igrexa e das teas pintadas fíxose cargo unha veciña que as gardou con delicadeza na súa vivenda.
Esta semana Santa, o Monumento volveu ocupar o seu lugar. O Concello decidiu restaurar esta peza única e para comprobar o seu estado foi necesario colocalo de novo, coa axuda dos veciños máis veteranos que aínda lembran como se facía. As madeiras e os lenzos representan escenas da Paixón e son un exemplo de arte popular singular. O seu estado de conservación non é bo, pero a maior parte das pinturas permanecen. A súa colocación servirá para que dous investigadores, José Manuel Garcia Iglesias e Juan Monterroso, realicen un informe que será remitido á Xunta para solicitar axudas para a súa restauración.
O alcalde de Beade , Fernando Taboada, sinala que foi Xosé Ramón Pousa, investigador, docente e xornalista, o que se puxo en contacto con el para recuperar esta peza única. «Buscamolas e estaban moito mellor do que esperabamos. As telas estaban gardadas nunha caixa e pódense ver inda as pinturas», relata o rexedor. Taboada agarda que coa súa restauración se converta nun emblema da localidade e nun atractivo turístico.
Pola súa banda, Xosé Ramón Pousa destaca a singularidade desta peza de Beade , da que non se coñece ao autor, e remite a un único estudo que foi realizado polo deputado Fernando González Suárez, que analiza pormenorizadamente as partes das que consta o monumento e cal era a súa finalidade.