A neve dificulta a circulación en varias estradas e deixou atrapadas a familias en vehículos de noite en Trives
OURENSE
Protección Civil tivo que rescatar a unha familia portuguesa de catro membros que quedaron varados tres horas nunha estrada secundaria
09 mares 2024 . Actualizado ás 18:42 h.Segue nevando copiosamente na montaña ourensá e hai varias estradas da provincia de Ourense que rexistran incidencias ou dificultades este sábado, 9 de marzo, por nevada . Segundo a DXT hai nivel vermello na OU-536, con circulación difícil entre os puntos quilométricos 24 e 40 debido á nevada. Neste tramo está prohibida a circulación para vehículos pesados, como autobuses ou camións e articulados, e é obrigatorio o uso de cadeas. Segundo a Garda Civil de Tráfico, embolsáronse (apartado) os vehículos pesados no quilómetro 24.
Na mesma estrada, uns quilómetros antes, ente o 19 e o 21 desde Niñodaguia ao alto do Couso, a circulación está condicionada pola neve aínda que a estrada é transitable con precaución. A autovía A-52 está aberta aínda que hai que conducir con precaución por nevada entre A Canda e Ábedes, do quilómetro 112 ao 155. Esta mañá, pouco despois das once, rexistrouse unha colisión no quilómetro 126 da autovía, na que se viron implicados dous camións. Un transportaba lixo e outro pezas de vehículos. Non perderon as súas cargas, pero quedaron atravesados na calzada, interrompendo a circulación. Non houbo feridos.
Segundo o 112 Galicia, os concellos ourensáns nos que houbo incidencias por neve esta xornada foron Montederramo, Nogueira de Ramuín, Chandrexa de Queixa, Avión, Calvos de Randín, Cualedro, Laza, Lobeira, Maceda, San Cristovo de Cea e A Gudiña.Na zona da Gudiña foi onde houbo máis complicacións e retencións de tráfico por mor da neve e do xeo na calzada.
Este mediodía, segundo a DXT a situación xa está máis tranquila e normalizada. Só hai que circular con precaución na estrada para subir á estación de montaña de Manzaneda, pero a autovía xa non rexistra incidencias.
Con nivel amarelo, transitable con precaución e prohibida para camións e articulados, está unha das vías de acceso á estación de montaña de Manzaneda . Na OU-0704 desde o quilómetro 2, en Cova, ata o 6.8, na cabeza de Manzaneda, en sentido crecente da kilometración a circulación é irregular. Para subir á estación de montaña é necesario dispor de cadeas para os pneumáticos. No lugar atópanse voluntarios da agrupación de Protección Civil de Trives, patrullas da Garda Civil de Tráfico e de seguridade cidadá para axudar aos condutores e previr incidentes. De feito, na autovía A-52 axentes de Tráfico tiveron que prestar auxilio a un grupo de doce motoristas que circulaban polas Estivadas. Houbo que levantar motos caídas e axudar aos moteiros.
Onte á noite houbo problemas, con persoas atrapadas nos seus vehículos, que tiveron que ser rescatadas por Protección Civil Trives. Segundo indica o 112 Galicia, dez minutos despois das 23.00 horas do venres, recibiron unha chamada dunha condutora que era incapaz de avanzar pola OU-0704. O caso máis grave ocorreu noutro dos viarios de acceso a estación de montaña, na OU-0705, que comunica Trives con Manzaneda. Dentro do coche estaban atrapado un matrimonio portugués con dúas nenas pequenas. Dirixíanse á estación de Manzaneda e o GPS mandounos por esa estrada desde A Gudiña. A neve deixounos atrapados na estrada que vai de Paradela á estación. Chegar ata eles foi complicado e só foi posible coa axuda do quitaneves. Pasáronse unhas tres horas no coche ata que puideron ser trasladados. O vehículo tivo que quedar alí.
Non foi o único caso de persoas que tiveron que ser rescatadas onte á noite polos membros de Protección Civil de Trives, axudados nalgún caso polo GES de Castro Caldelas. O 112 menciona que tiveron que realizar tres saídas máis por este motivo. Ata as tres da mañá tiveron que estar a buscar xente que non podía mover os seus vehículos, fosen turismos ou autocaravanas. É algo frecuente as fins de semana cada vez que hai nevada, comentan membros de Protección Civil da zona. Hoxe continúa nevando con intensidade na zona, polo que hai que extremar a precaución na estrada e ir preparados.
A zona oriental da provincia non é a única na que está a nevar. A climatoloxía adversa está condicionando a circulación noutras estradas da provincia. Segundo a DXT, na OU-540 (Ourense-fronteira de Portugal ), hai problemas entre os quilómetros 34 e 38, de Vilar a Martiñán, aínda que é transitable con precaución. En Baixa Limia hai estradas afectadas nas zonas altas de montaña de Calvos de Randín, en Rubiás dúas Mistos, e en Muíños , na parroquia de Requiás.