A Subida a Valdeorras suspéndese este ano coa promesa de seguir no Campionato de España de Montaña
OURENSE
Un problema de saúde do presidente da escuadra organizadora obriga a cancelar a proba neste edición
08 mares 2024 . Actualizado ás 05:00 h.A Subida a Valdeorras, que formaba parte do calendario do Campionato de España de Montaña (CEM) non se celebrará a súa sexta edición en xuño deste 2024, como estaba calendado. A José Manuel Torres, presidente da Escuadra Valdeorras, custoulle moito tomar a decisión de suspender a proba, pero por recomendación médica ten que descansar para recuperarse totalmente dun problema de saúde. Falou con outros membros da escuadra para que eles sacasen adiante unha proba que se fixo un sitio no calendario nacional da modalidade de montaña —xunto a citas tan consolidadas como a Subida ao Fito ou a Subida a Chantada— pero o equipo non sente capaz de organizala sen a dirección de Torres. O presidente temíase que, como consecuencia da renuncia, a Federación Española de Automobilismo faríalles perder a súa categoría dentro do CEM, pero o ente federativo promételles que, se a organizan o próximo ano, volverán estar dentro do campionato nacional de montaña. Para entón, Torres agarda estar xa restablecido.
A Subida a Valdeorras recuperouse no outono 2022, tras unha paréntese de 21 anos, e formou parte da Copa de España de Montaña. Foi considerada a mellor proba dentro dese certame e, ao ano seguinte, entrou no calendario CEM. Para este 2024, a Escuadra Valdeorras solicitara a cualificación como campionato FIA e xa estaba aprobado que se denominase Subida Internacional a Valdeorras.