Restablecida a circulación de camións na A-52 no límite entre as provincias de Ourense e Zamora
OURENSE
Máquinas quitaneves seguen traballando na zona para evitar a acumulación de neve
08 mares 2024 . Actualizado ás 13:36 h.A neve xa está a provocar problemas de circulación nas estradas da provincia de Ourense. Desde primeira hora da mañá os axentes da Garda Civil de Tráfico están a despregar medios en distintos puntos da rede viaria ante a previsión de que haxa incidencias en moitas estradas a causa do temporal.
A situación máis complicada polo momento é a que afecta o tránsito desde a provincia de Ourense ata Zamora pola autovía A-52. Hai nivel amarelo na vía de alta capacidade entre os quilómetros 113 e 143 e á primeira hora da mañá foi necesario deter aos camións nas áreas de servizo de Riós, A Mezquita e A Gudiña, para evitar que puidesen quedar atrapados na calzada e garantir que acceso a servizos se a situación se complicaba. Pouco despois das once e media da mañá a circulación quedou restablecida e todos os vehículos poden circular, aínda que seguen despregadas numerosas patrullas do instituto armado e pídese precaución a todos os condutores.
Tamén están a traballar máquinas na estrada OU-536, que comunica Ourense con Trives. A situación máis complicada é a que se rexistra entre os quilómetros 23 e 42, entre Maceda e Montederramo. Pídese precaución a todos os condutores que transiten por esa calzada.
O despregamento de medios ante o temporal de choiva e neve que azouta á provincia hase estendido tamén este venres á OU-540, con algunhas incidencias entre as localidades de Verea e Bande e tamén se alerta a quen teñan que circular pola OU-533. No termo municipal do Bolo está a complicarse a circulación e as quitaneves xa están sobre o terreo.