O bote de case 1,9 millóns de euros na Bonoloto cae en Baños de Molgas: «Máis dun 90% de xente que xoga é da zona»
OURENSE
O boleto selouse no bar Mari Trini, da rúa Ladeira, 13, que xa deu premios noutros sorteos
20 feb 2024 . Actualizado ás 17:14 h.O sorteo da Bonoloto deste luns, 19 de febreiro, deixou un novo millonario na provincia de Ourense. O premio da primeira categoría, que tiña un bote de 1.884.275 euros foi selado no punto de venda do bar Mari Trini, en Baños de Molgas.
O dono do establecemento, Moncho Díaz, confirmaba que esta noite lle chamaron da delegación de loterías para comunicarlle que o boleto fora selado alí. Moncho leva 31 anos a cargo do bar Mari Trini e non é o primeiro premio que dan. Fai tres anos, lembra, entregaron outro da Bonoloto, de 91.000 euros. Deron tamén un primeiro premio da Lotería Nacional, de 60.000 euros, outro de 62.000 e un quinto da lotería de Nadal, de seis mil,« No 2013 quedamos a un díxito, o segundo, de dar o gordo de Nadal e no sorteo seguinte de Reyes pasounos o mesmo», lembra Moncho.
O xerente do bar Mari Trini cre que hai máis dun 90% de probabilidades de que o afortunado sexa un xogador local. A combinación gañadora foi: 6, 9 ,19, 23, 25, 37, Complementario o 20 e reintegro 7. O gañador acertou os seis números.