Desde xaneiro búscase ás dúas últimas no Carballiño e na Raia de Oímbra
13 feb 2024 . Actualizado ás 05:00 h.Dez persoas desaparecidas na provincia de Ourense nos últimos anos seguen figurando nos rexistros dos organismos oficiais e das organizacións que dan conta deste tipo de sucesos . Actualmente son dous as procuras activas de desaparecidos recentes, a de María Ángeles Míllara, a muller de 54 anos que falta desde o 14 de xaneiro deste 2024, e a do cidadán portugués Joãou M. Magalhãé, de 69 anos, a quen se lle perdeu a pista o 9 de xaneiro na zona fronteiriza entre Oímbra e Montalegre.
Por agora non hai resultados nos rastreos e as familias de ambos seguen agardando respostas. Os mergulladores da Garda Civil percorreron a zona do río Arenteiro preto do parque municipal do Carballiño , o último lugar á que dixo que se dirixía María Míllara o día que desapareceu. No caso do home luso, atopouse o seu coche preto de Videferre (Oímbra). A policía xudicial de Portugal sumouse á investigación sobre esta desaparición. Examinouse o vehículo sen que se atopasen indicios da intervención de terceiras persoas. Ademais de voluntarios e de membros dos corpos de seguridade de España e Portugal, empregouse a tecnoloxía de drones para buscar a este desaparecido nunha zona montañosa. Ata agora, sen éxito.
O caso anterior que segue sen resolverse é o de Marcial Manteiga, un veciño da aldea de Regueiro de Boborás, que desapareceu o 1 de abril do 2022. Como caso activo aínda figura tamén o da desaparición de José Anxo Abadín Rodríguez, no Pereiro de Aguiar, unha denuncia que se formulou en agosto do 2020. SOS Desaparecidos ten aínda a imaxe do desaparecido en Casaio (Carballeda de Valdeorras) no 2017, Ervigio Carreira, solicitando a colaboración cidadá para atopalo. En abril dese mesmo ano denunciouse a ausencia de Belén Rodríguez, veciña da cidade que tiña unha casa de turismo rural en Trives. A súa procura non deu tampouco resultado. En idéntica situación están os casos de Jesús Bermejo, desaparecido na Rúa no ano 2015, de Gumersinda Raña, que saíu un domingo de febreiro de fai case dez anos da súa casa de Barroso (Avión) e non lla volveu a ver. E aínda hai máis tempo da desaparición, no 2011, da veciña da Veiga Catalina Macías. O caso de Elías Carreira, un taxista da cidade, cuxa desaparición denunciou a súa familia no 2013, aínda figura entre os desaparecidos en Ourense na web da Policía Nacional. Só dous casos, un home no 2022 e unha muller no 2020, reflíctense como ausencias involuntarias.
Son unha decena de situacións sen resolver, aínda que a maioría das denuncias por desaparicións acaban cesando. Así, segundo a estatística do Centro Nacional de Desaparecidos do ano 2022 —o último con datos completos publicados—, hai dez denuncias activas. Con todo, houbo moitas máis notificacións que xa se atopan cesadas ou resoltas, concretamente 54 de homes e 37 de mulleres. No ano 2019, houbo aínda máis: 84 masculinas e 56 femininas, xa pechadas. A maioría cesan polo retorno do desaparecido ou porque o denunciante pide que se peche.
Segundo o informe anual de persoas desaparecidas publicado no 2023, a nivel nacional o 94,7% das denuncias están resoltas e 2,3% activas. En España, tres de cada cen casos corresponden a mozos tutelados que se van dos centros de menores. A estatística reflexa que a maior parte das denuncias que se poñen (un 65,4%) son de menores e un 34,6% son de persoas de máis de 18 anos. Dos once casos de menores ausentados rexistrados en Galicia no 2022 ningún era de Ourense.
Días ou anos para atopar rastros en paraxes naturais de difícil acceso
Co paso dos días tras unha desaparición adoitan desvanecerse as probabilidades de que aparezan con vida as persoas ás que se busca. Aínda que os achados sexan dolorosos polo desenlace de falecemento, atopar o corpo ou os restos do ser querido achega polo menos algo de paz aos familiares despois de moito tempo de incerteza. Nos últimos meses, dúas das desaparicións que estiveron activas en Ourense déronse por cesadas. Nun caso, tras unha semana de procura, no río Arenteiro atopouse o corpo de Concepción Vázquez, veciña de Arcos de 79 anos que se perdeu o 9 de decembro. En novembro do ano pasado atopábanse en Allariz uns restos óseos que se confirmou, con probas do ADN, que pertencían a Julio Fernández, un home de 90 anos que desapareceu no ano 2017. Buscóuselle no río Arnoia, pero estaba noutra zona de Allariz, preto do antigo castelo.