Os carballiñeses confían en conceder os seus primeiros minutos a Christian Santos
10 feb 2024 . Actualizado ás 05:00 h.Un Club Deportivo Arenteiro en cadro crebou a súa serie de tres partidos sen perder en Sestao, pero volverá presentar unha aliñación máis recoñecible para recibir (Espiñedo, 19.00 horas, TVG2 e FEF TV), a unha Cultural Leonesa no terceiro posto da táboa e con notable protagonismo dos galegos Quique Fornos, Bicho, Kevin Presa e Aarón Rey .
No bando local, Javi Rey deixaba aberta a opción do posible debut do exdeportivista Christian Santos, se se solucionaba a tramitación do seu pase internacional. Tamén está pendente de recuperar ao meta Diego García e ao polivalente Vitra, mentres que Javi Moreno cumpriu a súa sanción e Pibe tamén está bastante restablecido das molestias que o minguaron en terras vascas. O técnico ourensán salientaba: «O equipo está ben e transmíteme que imos competir ante un rival feito para ascender, dos mellores do grupo».
Tamén sinalou Rey Pérez á tarefa realizada desde o banco dos leoneses e ao que considera un adversario ben traballado: «Gústame o labor de Raúl Llona, un adestrador que prepara moi ben os partidos, manexando varios sistemas ou mesmo un en fase defensiva e outro en ofensiva ou cambiando no mesmo partido. Ademais saben perfectamente o que se van atopar en Espiñedo e intentarán contrarrestalo».
Aludiu o estratego dos carballiñeses a un terreo de xogo que saíu tocado das últimas xornadas e que foi sometido a intensas choivas nas últimas horas, polo que ambos os equipos deberán facer gala dunha concentración máxima e adaptarse case de modo forzado a un fútbol máis directo.
Volvendo ao seu equipo e a pesar dos condicionantes que afrontará o cadro técnico nas horas previas ao partido, Javi Rey mostrábase convencido de que o Arenteiro presentará «un once competitivo e con xente no banco para realizar modificacións, será un equipo capaz de ter o balón e apertar, no medio dun gran ambiente de fútbol que, a pesar das condicións climatolóxicos, xogarase en plenos entroidos».
Os visitantes enlazaron dúas vitorias e catro empates nos seus últimos partidos e, aínda así, están a tres puntos do líder, en tanto que os anfitrións chegaron á barreira dos trinta, antes de xogar dous sábados seguidos en casa. Seguen remando.