O PP comprométese a reclamar unha marquesiña para os taxistas da estación intermodal
26 ene 2024 . Actualizado ás 18:20 h.A falta xa de menos dunha semana para o arranque oficial da campaña electoral, o PSOE ourensán recorreu este venres a un dos seus principais reclamos en Galicia, Abel Caballero. O alcalde de Vigo visitou a cidade xunto a membros da candidatura socialista por Ourense. O partido, ademais, dedicou parte da xornada a denunciar o «calamitoso» estado da OU-536 en Xunqueira de Espadanedo, onde se produciu un afundimento na calzada. Por outra banda, os socialistas cualifican o programa do entroido presentado polo alcalde de Ourense, Gonzalo Pérez Jácome, como un «malgasto» con fins electoralistas.
O PP, pola súa banda, mantivo unha reunión con representantes do colectivo de taxistas. Ao encontro asistiron Victoria Núñez, Gabriel Alén, Noelia Pérez e Marisol Díaz, quen se comprometeron a seguir loitando por unha marquesiña que protexa a súa parada na estación intermodal. En canto ao BNG, a súa candidata por Ourense, Noa Presas, presentou un novo modelo de coidados «que poña ás persoas no centro». O Bloque comprométese a crear mil prazas de gardería no primeiro ano de lexislatura.