1.494 ourensáns tiveron que ingresar de urxencia no hospital
10 ene 2024 . Actualizado ás 05:00 h.Durante as vacacións do Nadal, 1.494 ourensáns tiveron que ingresar de urxencia no hospital. Un total de 1.289 persoas acabaron nunha planta do CHUO, 104 no Hospital Comarcal de Verín e 101 no de Valdeorras. Supón un 13 % máis dos que precisaron pasar polo menos unha noite hospitalizados nas festas do Nadal do ano pasado.
O Complexo Hospitalario Universitario de Ourense acapara a maioría dos casos «porque é referencia para todos os ingresos de maior gravidade e complexidade de toda a provincia, e tamén para aqueles de especialidades que non existen nos dous comarcais», explican desde a área sanitaria.
Cos picos en Urxencias
En canto aos días, o de Nadal foi o que acabou con maior volume de nenos hospitalizados, un total de cinco. Do outro lado da balanza, os días 27 de decembro e o 2 de xaneiro non foi preciso pasar a planta a ningún dos menores que acudiu por Urxencias.
En adultos, o día máis complicado foi o 3 de xaneiro, con 111 persoas hospitalizadas de urxencia; mentres que en Nadal se rexistrou o número de ingresos máis baixos: 63.
Os días de máis hospitalizacións correspóndense tamén cos picos de actividade nos correspondentes servizos de Urxencias. Na área de Pediatría o 25 de decembro atenderon a 125 menores; mentres que na de adultos o maior auxe viviuse o 2 de xaneiro, con 264 pacientes consultados.