Protección Civil de Verín formará en primeiros auxilios aos adegueiros da comarca
OURENSE
O Consello Regulador da Denominación de Orixe Monterrei e a agrupación de urxencias asinaron un acordo de colaboración
24 dic 2023 . Actualizado ás 05:00 h.O presidente do Consello Regulador da Denominación de Orixe Monterrei, Jonatás Gago García, e o presidente da Agrupación de Voluntarios de Protección Civil de Verín, Manuel Alfonso Araújo, rubricaron esta semana un acordo de colaboración entre as dúas entidades que permitirán ampliar os servizos de ambas as entidades. O convenio contempla a cooperación no operativo de seguridade da Feira do Viño de Monterrei pero tamén a posta en marcha de cursos de formación en primeiros auxilios. A agrupación de Protección Civil encargarase de deseñar o contido desa actividade orientándoa á actividade dos adegueiros que serán o seu público obxectivo, ademais de membros do consello regulador. Esta é a segunda ocasión na que o órgano reitor da DO Monterrei establece un acordo de colaboración con Protección Civil á que axudou a adquirir unha carpa para o seu uso nos diferentes operativos aos que acode o grupo de urxencias.