Unha fábrica de gasosas foi a orixe dunha gran distribuidora de bebidas que dá traballo a 15 persoas en Valdeorras
OURENSE
A empresa fundada en 1974 na Rúa reparte Fillos de Rivera e Coca Cola
25 dic 2023 . Actualizado ás 18:04 h.Ao volver da emigración en Francia, Jaime Rodríguez comprou a fábrica de gasosas Regueiro na Rúa de Valdeorras e fundou gasosas Roca. Fabricábaa e distribuíaa pola localidade e en Petín, Larouco e A Veiga, onde levaba tamén cervexa e refrescos. Naquel entón (a empresa comezou a funcionar en 1974) eran dúas ou tres traballadores, lonxe dos quince que son agora. No proceso, a empresa que agora capitanean os seus fillos, Jaime e Carina, foi gañando mercado e ampliando a súa carteira de produtos. Son os distribuidores de Fillos de Rivera, Coca-Cola, Cafés Lisboa e Central Leiteira Asturiana; ademais de ter na súa oferta varias adegas da denominación de orixe Valdeorras como son Joaquín Rebolledo, Alán de Val e Luar do Sil. Venden tamén licores, aperitivos, xamóns e embutidos, así como produtos de limpeza para hostalería. Porque os bares, restaurantes e demais negocios do sector son os seus principais clientes, xunto ás pequenas tendas de alimentación que existen no rural. Distribúen as marcas de Fillos de Rivera, que inclúen desde Estrella Galicia a Cabreiróa, en toda a comarca de Valdeorras, Viana e Terras de Trives. No que respecta ás marcas de Coca-Cola, a súa área de repartición suma tamén Quiroga, San Clodio, A Pobra do Brollón e O Courel. Seguen vendendo Gasosas Roca, aínda que xa non a fabrican eles.
Nas festas destaca a venda de viño para as ceas do Nadal, apunta Jaime. E tamén os lotes en forma de cesta para os aguinaldos que moitas empresas seguen repartindo aos seus empregados ao chegar estas datas e que inclúen algunhas botellas, embutidos e o tan socorrido xamón. «Tamén ten moita saída a sidra achampanada de Fillos de Rivera, Maeloc», di o responsable de Distribucións Roca.