O Arenteiro dobrega ao Sabadell cun xogo de moitos quilates (2-0)

O Arenteiro crello, entrou tímido na Primeira Federación e aos poucos vai engraxando unha máquina de equipo da categoría, sen complexos. Igual que se plantou con personalidade en Lugo, ante un pechacancelas inesperado como o Sabadell, soubo aclimatarse a un Espiñedo pesado e dominar baixo a pertinaz choiva a un rival incómodo, pero aguilloado pola súa clasificación, ao que ao cabo derrotou: 2-0.

Javi Rey foi fiel ao 4-2-3-1, á vez que Óscar Cano buscaba o seu primeiro triunfo cos cataláns en defensa de cinco, con Manel —chegado este ano da Malata— como referente en punta. En ausencia do lesionado Marquitos, os carballiñeses deitaron a Iván Ramos na dereita, con moita mobilidade de Pibe, quen sementaba o caos cando se dirixía a ese costado. Algo similar sucedía nas diagonais de Luis Chacón desde a esquerda. Estes dous combinaron para o croque picado do de Pontedeume, que pechou un cuarto de hora inicial con moito tráfico por dentro. Pouco despois foi un centro chute do arxentino de Cambados o que fixo traballar a Ortolá, mentres que os barceloneses eran máis incisivos se tocaba o balón Cristian Herrera. O seu centro desde ese flanco zurdo serviu para un gran remate de Manel, que lle sacou Diego García cunha felina estirada á base do poste.

Nando García tamén penalizou unha mala saída de balón dos locais, que repeleu Javi Moreno, cando Diego xa estaba batido. Aínda así, por aquel entón Vicente Esquerdo xa gobernaba o que xogaba na medular e o tempo de circulación do esférico. O gol parecía cuestión de minutos. Iván Ramos apremou a Ortolá nun centro pechado cuxo rexeite estivo a piques de cazar Luis Chacón, quen non perdoou á seguinte. Pibe volveu crebar a súa marca —laxa, esta vez— e centrou en busca de Luisiño. O máis pequeno na área rouboulle a carteira aos defensores e cabeceou impecable un coiro que chegou rexeitado. E van seis dianas.

Os verdes fóronse ao vestiario co sorriso do 1-0 e de volta viron que o Sabadell apertaba. Toni Herrero atopouse con Diego García, tras un centro lateral, e Manel rematou fóra. Os de casa non baixaban a garda e, entre medias, Miku non chegou por centímetros a un envío preciso de Álvaro Ramón.

Óscar Cano revitalizou a súa aliñación e Álex Gualda gozou de dúas oportunidades. Pero, á hora dos cambios, Javi Rey ten un as na manga cando dá entrada a Manín. Á media hora da continuación, o omnipresente Pibe triangula con Álvaro Ramón como lle gusta ao berciano, balón profundo pola esquerda e centro ao corazón da área. Alí mirou de esguello o xerezano e sacouse un remate de tacón que desesperou a todo o equipo visitante, no momento en que el celebraba o seu novo tanto. De sombrerazo.

Coa dobre vantaxe, o Arenteiro foi máis autoritario e púxolle o cadeado ao enfrontamento. Un opoñente abatido só volveu ameazar a portería local cando se lanzou con valor no alongue. Tres puntos máis, sétimos. E o mércores Copa do Rey. Por que non soñar?

---

---

---