A última convocatoria facilita a apertura de cinco recursos máis para a atención a menores de tres anos no rural, que se suman ás 46 instalacións que xa están en servizo
01 sep 2023 . Actualizado ás 05:00 h.A nova convocatoria da Xunta para a apertura de casas niño permitirá a posta en marcha de cinco máis na provincia ourensá. Estarán en Xunqueira de Espadanedo, Chandrexa de Queixa, Monterrei, Laza e Lobios e con elas o territorio ourensán consolídase como o primeiro de Galicia neste tipo de servizos orientados a ofrecer atención a menores de tres anos en municipios que non acadan os cinco mil habitantes. Con estas novas incorporacións —o ano pasado sumáronse aperturas en Verea e Pontedeva— a provincia concentra máis da metade destes recursos en Galicia, segundo lembrou o delegado da Xunta en Ourense. Gabriel Alén, que visitou en Xunqueira de Espadanedo tanto a que xa está en funcionamento como as obras da segunda instalación que se abrirá neste concello en breve, destacou a importancia de seguir potenciando este servizo da Consellería de Política Social.
Creadas no ano 2016, cásalas niño pretenden axudar á conciliación familiar e laboral dos que residen en núcleos rurais, dentro de municipios que non dispoñen de servizo de escolas infantís. En cada unha delas pódese atender ata a cinco pequenos de forma simultánea. Política Social ten liñas de axuda específicas para que as persoas que queiran pór en marcha o servizo poidan afrontar os gastos de acondicionamento dos locais que albergarán a instalación, cun límite máximo de 15.000 euros por proxecto. A iso súmase o financiamento para cubrir os gastos da actividade diaria, que na última convocatoria fíxase que pode chegar aos 21.560 euros por cada casa niño.