A Deputación de Ourense desenvolve a súa programación lúdica ao longo de xullo
22 jul 2023 . Actualizado ás 05:00 h.O pasado 10 de xullo comezaron no Pazo dos Deportes Paco Paz as Escolas de Verán depOUrtivas. Trátase dun programa de concienciación destinado a nenos de entre 4 e 14 anos e organizadas en tres semanas. As dúas primeiras xa levaron a cabo e a última concluirá do 24 ao 29 de xullo.
«Non se se é porque é a primeira vez que se fai pero está a ter moi boa acollida», afirma Alberto González, xefe do servizo de Deportes da institución provincial. A finalidade destes exercicios é permitir a conciliación das familias e educar a través do deporte aos mozos. «Aproveitamos para que os máis pequenos se formen con charlas de deportistas profesionais, da garda civil ou de primeiros auxilios», asegura González.
Ademais de deporte tamén se desenvolven actividades de temática cultural e proxectos sobre a igualdade ou a reciclaxe. Outros deportes como o hockey ou tiro con arco tamén terán un espazo neste evento.
Os mozos son divididos en grupos, principalmente por rangos de idade, e as súas actividades están dirixidas por monitores de Ociosaugal.
O horario destas actividades comeza ás 8.00 horas para todos aqueles que demandan o servizo de atención matinal. Ata as 9.00 poden entrar todos os participantes que estarán ata as 14.00 horas. Aqueles que se inscribiron na quenda de comedor poderán gozar ademais deste servizo ata as 15.00 horas, cando finalizará o día. A cota é de 25 euros cada semana e 60 euros incluíndo a opción de comedor, co obxectivo de que o factor económico non sexa un inconveniente para os nenos que desexen tomar parte na iniciativa.
«O prezo é accesible para todo o mundo porque non queriamos competir con ningún campamento ou campus. A deputación está para sumar, non para competir», conclúe Alberto. De feito, nun futuro agárdase poder celebrar máis edicións e alongar a súa duración ao mes completo de xullo, unha idea que este ano non se puido levar a cabo pola celebración doutros eventos.