O escritor Xosé Manuel do Caño invitou a pintores e escultores a realizar pezas sobre a icona relixiosa de Vilanova dos Infantes
04 jun 2023 . Actualizado á 05:00 h.Máis de dez pintores e escultores galegos comprometeríanse a traballar na realización de imaxes da icónica Virxe do Cristal, cuxa diminuta talla orixinal desapareceu ao ser asasinado, en marzo do 2015, o párroco de Vilanova dos Infantes, Adolfo Enríquez, que a custodiaba.
Segundo deu a coñecer o autor Xosé Manuel do Caño na presentación na torre de Vilanova do seu libro Ósos de Santo, artistas como Manuel Buciños, Acisclo Manzano, Xosé Cid, Ramón Conde, Xurxo Oro Claro, Soledad Penalta, Xulia Ares, Baldomero Moreiras, Francisco Xosé Pérez Porto e Miguel Ángel Martínez Coello están a traballar niso. O escritor ourensán fixo un chamamento a outros artistas galegos para que se sumen.
Pola súa banda, cada exemplar do libro de Do Caño inclúe unha lámina da virxe e o autor entregou ao cura un óleo sobre tea de Carmucha Vázquez Prats sobre a imaxe, que quedou depositado no santuario do Cristal.