«En Italia teño un traballo que me apaixona, pero non me esquezo de Galicia»

Aínda que naceu en Ourense e pasou os seus primeiros anos na cidade dAs Burgas, concretamente no barrio da Cuña, lembra con cariño o tempo de infancia que pasou en Freande, no municipio de Sarreaus, rodeado de natureza e liberdade. Así é Óscar Fernández González, que aos seus 29 anos atesoura unha grande experiencia vital forxada con vivencias en varios países. Hoxe reside en Vicenza (Italia), cidade á que chegou tras participar nun programa europeo para emprendedores.

Antes diso estudou no colexio San Pio X. Logo matriculouse na Universidade Laboral e, chegado o momento, apostou polo grao de Xeografía e Historia. Esa non sempre fora a súa vocación. «Durante a miña época no instituto intereseime inicialmente pola enxeñería e a tecnoloxía», lembra, admitindo que sentía fascinación polo concepto de robótica. Pero atopaba áridas as materias que necesitaba estudar para este tema, como as matemáticas, e xa no bacharelato descubriu que lle gustaban as humanidades, especialmente dúas ramas. «Da historia atraíame o seu carácter multidisciplinar e a idea de reconstruír o pasado, e da filosofía a procura do coñecemento profundo do material e o inmaterial», asegura este mozo profesional, que finalmente se decantou pola primeira desas materias. Cando estaba no terceiro curso empezou a saborear outra liberdade, a que achegan as viaxes. Foise cunha bolsa Erasmus a Cagliari, en Italia, onde pasou seis meses como estudante e medio ano máis realizando as súas prácticas curriculares na oficina de relacións internacionais da universidade desa cidade. «Aquilo cambioume profundamente a vida e redireccionó os meus intereses profesionais cara ao mundo da educación e os proxectos de intercambio estudantil como o Erasmus», conta.

De volta a España e tras facer un máster, estivo en Eslovenia e Chipre. Despois da pandemia regresou a Ourense, nun momento no que as oportunidades laborais non eran boas, pero non quedou de brazos cruzados: «Decidín participar nun programa europeo ligado ao emprendemento titulado Erasmus for young entrepreneurs. Trátase dunha iniciativa que permite a novos emprendedores realizar un período de prácticas nunha empresa do seu interese noutro país cunha duración máxima de seis meses». Aquilo foi o pasaporte para unha nova etapa, de novo lonxe da súa cidade natal, en Vicenza (Italia). A empresa na que fixo as prácticas, Fortes, deulle a oportunidade de quedarse máis tempo, e non a rexeitou. «A compaña dedícase principalmente á xestión de proxectos internacionais de intercambio financiados pola Unión Europea no ámbito da formación profesional e dentro dela eu realizo moitas actividades distintas», explica Óscar, que pasa boa parte do seu tempo acompañando a grupos de estudantes e profesores de varios países que viaxan a esa cidade para realizar prácticas ou visitas de estudo. «Tamén sigo con proxectos de investigación, organización de eventos e creación e implementación de actividades de educación non formal», asegura. A vida nesta cidade gústalle. «Fixen amizades moi pronto e atopeime ben desde o primeiro momento no traballo. Cada día que pasa síntome máis conectado coa cultura do norte, aínda que o meu espírito segue na alegría do sur do país», admite. «Vivir en Italia permíteme ter un traballo que me apaixona e tempo para ler, cociñar e gozar do tempo coa miña compañeira e os meus amigos, pero iso non é suficiente para esquecer Galicia», recoñece este profesional, que a pesar de todo sabe que neste momento un regreso sería complicado. «Alí non hai moitas ofertas de traballo do meu interese, aínda que é unha terra con moi boas oportunidades para descubrir e explotar», asegura. Xunto con outro compañeiro creou hai tempo a asociación sociocultural BreGal, un proxecto que mantén e co que xa realizaron xa algún proxecto de intercambio xuvenil en Galicia.

 

vicenza, un cidade renacentista

Describe Óscar Fernández a cidade de Vicenza como unha urbe «elegante e renacentista». Comparte piso nunha vivenda con vistas ás montañas e atardecers/atardeceres «espectaculares». Leva unha vida cómoda e gústalle o clima empresarial da vila, pero bota en falta máis vida social. «Comparada con Ourense, Salamanca ou Cagliari, é unha urbe bastante apagada, sobre todo pola noite», asegura.

Un profesional viaxeiro

 Óscar Fernández naceu en Ourense en 1993. Estudou no colexio San Pio X e logo pasou á Universidade Laboral. Matriculouse no grao de Xeografía e Historia do campus de Ourense e despois de graduarse foise a Salamanca para facer un máster de Estudos Europeos. Meses despois deste posgrao participou nun programa de intercambio xuvenil de curta duración en Eslovenia e tamén estivo un tempo en Burgos. Máis tarde foise a vivir a Nicosia (Chipre), cun proxecto de voluntariado europeo. Tras regresar a Ourense, despois da pandemia, creou unha asociación que promove intercambios xuvenís. Ademais vinculouse a un programa europeo que o levou a Vicenza, onde reside agora. Traballa nunha empresa de xestión de proxectos relacionados coa formación profesional.

---

---

---