«Eu sempre digo que política se escribe con pe de pacto, pero primeiro hai que escoitar», di o líder provincial do PP
14 feb 2023 . Actualizado ás 05:00 h.Segundo o barómetro de Sondaxe para La Voz de Galicia, Gonzalo Pérez Jácome podería seguir como alcalde unicamente se chegase a acordos co PP e o PSOE. Con todo, o candidato socialista, Paco Rodríguez, descártao, mesmo aínda que estivese en xogo un posible cambio de goberno na Deputación. «Afirmamos rotundamente que non imos participar diso», dixo onte na presentación da súa oficina de campaña, alugada nun segundo piso da rúa Progreso.
Rodríguez —que non avanzou ningún nome para a súa futura candidatura a excepción do de Natalia González, secretaria xeral do partido— admitiu ter unha «boa relación» co candidato do PP, Manuel Cabezas, pero remarcou que ambas as formacións son «antagonistas». En calquera caso, mostrouse aberto a chegar a acordos puntuais cos populares para abordar a xestión municipal se non hai maiorías absolutas. De todos os xeitos, subliñou que o «pacto natural» sería PSOE-BNG, un bipartito como o que el mesmo liderou entre o ano 2007 e o 2012.
A resposta do líder do PP
Paco Rodríguez instou ao PP a aclarar se estaría disposto a repetir pacto con Jácome ou se facilitaría unha substitución. «É falar por falar», comezou dicindo José Manuel Baltar, a quen lle preguntaron aproveitando unha rolda de prensa na Deputación. Segundo dixo, é «política-ficción» e subliñou que antes hai que agardar a ver os resultados electorais. «Eu sempre digo que política se escribe con pe de pacto, pero primeiro hai que escoitar», dixo o líder provincial do PP, que defendeu ao candidato popular, Manuel Cabezas, como «o mellor alcalde da historia». Asegurou, neste sentido, que Rodríguez se presenta como reacción á designación popular.