Protección Civil rescatou a excursionistas e veciños durante as últimas nevadas
OURENSE
Os voluntarios axudaron a persoas atrapadas en Muíños, ao paso de ambulancias na Veiga e a visitantes na cabeza de Meda
24 ene 2023 . Actualizado ás 05:00 h.As nevadas da pasada semana puxeron en situación comprometida a algúns veciños de localidades nas que resultaba difícil acceder e tamén a excursionistas que se desprazaron a paraxes naturais sen contar co equipamento adecuado. Por iso, os voluntarios de Protección Civil dos Concellos afectados interviñeron para axudar á poboación que o requiría. Os compoñentes das agrupacións asistiron en casos como o dunha persoa maior á que houbo que acudir en Muíños xa que non podía mover o seu vehículo, enterrado pola neve. Na Veiga, os voluntarios colaboraron para facilitar o paso de ambulancias que non podían transitar debido á gran acumulación de neve nas estradas.
Ademais das necesidades da poboación residente, as agrupacións de Protección Civil atenderon casos de persoas que decidiron realizar algunha excursión a zonas complicadas, como o monte Meda, en Parada de Sil, onde está situado un parque eólico e fixérono sen levar cadeas para o coche ou sen a roupa adecuada, polo que se atoparon nalgunha situación de apuro que se liquidou coa chegada dos servizos de urxencia.