Dous dos tres focos de Oímbra xa están controlados e mellora a situación nos lumes de Valdeorras
OURENSE
Os medios de extinción seguen moi pendentes da situación no gran incendio de Carballeda de Valdeorras, que leva dez días activo
23 jul 2022 . Actualizado ás 14:36 h.Despois de moitos días de intenso traballo por parte dos equipos de extinción os lumes forestais que afectan á provincia de Ourense empezan a dar unha tregua. Este sábado dous dos tres focos que se localizaron en Oímbra, en concreto nas localidades de Videferre e San Cibrao, atópanse xa controlados, despois de ter queimado 800 e 400 hectáreas respectivamente. Segundo confirmaron desde a consellería de Medio Rural, o lume de Rabal, tamén en Oímbra, está estabilizado tras ter consumido 2.100 hectáreas. Así, o balance de hectáreas arrasadas polos incendios na comarca de Monterrei, que tamén afectaron ao municipio de Verín e tiveron en albas a decenas de veciños, ascende a 3.300. Os incendios entraron o luns desde Portugal e na súa propagación tivo moito que ver o forte vento, que dificultou os labores de extinción e obrigou a desaloxar das súas vivendas a moitos residentes.
Mentres, en Carballeda de Valdeorras, a situación mellora pero os medios de extinción están moi pendentes do que poida suceder en Vila, Quereño, Pumares e Sobredo, que conforman os núcleos máis complicados nestes momentos.
Este virulento incendio, que se orixinou en Riodolas por mor dunha tormenta eléctrica, consumiu xa 10.500 hectáreas e na súa extinción traballan nestes momentos 156 brigadas, apoiadas desde o aire por 12 avións e 13 helicópteros. Na zona segue tamén despregada a Unidade Militar de Urxencias e continúan prestando servizos en labores de vixilancia axentes da Garda Civil e Policía Autonómica, apoiados por persoal dos grupos locais de protección civil. O incendio foise estendendo durante a fin de semana desde Carballeda ata O Barco, pasando logo a Rubiá e chegando ata o Bierzo. Ao seu paso deixou decenas de casas arrasadas e moita desolación entre os habitantes. Medio Rural informou de que se desactivou a situación (por proximidade a núcleos de poboación) que se solicitou porque as chamas estaban próximas a Candeda.
En Vilariño de Conso o lume hase levado por diante 5.800 hectáreas, unha parte importante deles no parque natural do Invernadeiro.