A patronal ourensá súmase ás alegacións autonómicas á lei de mobilidade estatal
10 may 2022 . Actualizado á 05:00 h.A Xunta e a patronal ourensá fixeron fronte común para reclamar ao Gobierno central unha lei de mobilidade sostible que teña en conta as comunicacións do rural e evite agrandar as desigualdades territoriais. A CEO e a administración autonómica instan o Ministerio de Transportes a ter en conta as peculiaridades de Galicia, como a dispersión e o envellecemento da poboación na planificación das infraestruturas e os servizos de mobilidade. Piden, en concreto, que se prioricen factores como o reequilibrio territorial e a cohesión social e non só criterios de rendibilidade económica.
Neste sentido, a conselleira de Mobilidade, Ethel Vázquez, critica que o anteproxecto de lei presentado polo Estado aposte por suprimir servizos de tren o rural, substituíndo o ferrocarril de media distancia por transporte por estrada, que deben pagar as comunidades. Alerta, ademais, de que esta norma pretende ser unha «escusa legal» para non facer obras como as autovías a Lugo (A-56) e a Ponferrada (A-76). Ademais, a Xunta e os empresarios coinciden na oposición frontal a sistemas de pago por uso nas autovías baseados na distancia percorrida, pois consideran que aumenta o desequilibrio territorial.
Máis de 50.000 habitantes
A conselleira de Mobilidade advirte que esta lei xera unha especial preocupación en Ourense, polo que pode supor para esta provincia, eminentemente rural, na que o 75% dos municipios contan con menos de 2.000 habitantes. Doutra banda, a Xunta asegura que os criterios do Gobierno central na repartición dos fondos Next Generation de mobilidade, que teñen que ser investidos en núcleos de máis de 50.000 habitantes, implican deixar fóra ao 97,8% dos municipios galegos. Concretou que en Ourense, só a capital supera os 100.000 habitantes e non hai ningún municipio que teña unha poboación entre 20.000 e 100.000 habitantes. «Esta circunstancia lastra o desenvolvemento de melloras viarias», concluíu.
Ao acto asistiron numerosos representantes empresariais.