Leonor Silveira: «É estúpido crer que a muller é capaz de crear menos que o home no cine»
OURENSE
A actriz portuguesa, que recibiu o premio Calpurnia de Honra Internacional do OUFF, enxalzou a valentía e capacidade de resistencia do mundo artístico durante a pandemia
26 sep 2021 . Actualizado á 05:00 h.A actriz portuguesa Leonor Silveira aproveitou a súa comparecencia na sala de prensa do OUFF para agradecer a concesión do premio Calpurnia de Honra Internacional, para reivindicar o papel da muller no audiovisual. Silveira apostou polo modelo sueco de apoio á produción audiovisual que busca que os traballos asinados por mulleres acaden polo menos a paridade na repartición de axudas institucionais. «Considero que é estúpido que alguén crea que a muller é capaz de crear menos que o home no cine», apuntou tras lembrar o «traballo extraordinario» de moitas compatriotas súas.
Silveira desvelou algúns detalles singulares da súa longa traxectoria profesional, como que no seu criterio para escoller os papeis que interpreta, pesa, sobre todo a confianza que lle inspire o produtor do proxecto. Tamén falou sobre a situación do sector tras a pandemia e das dificultades que afronta ante a desaparición de distribuidoras e os retos das novas plataformas. A actriz destacou a «valentía inédita demostrada polas persoas que traballan nas artes para seguir sempre adiante».
A laureada actriz non foi a única protagonista da xornada na sala de prensa do festival, pola que tamén pasou Luma Gómez, que recibiu o premio a toda a súa traxectoria da Fundación da Asociación de actores e Intérpretes (AISGE). A actriz, con preto de cincuenta anos de carreira e máis de trinta coa súa compaña Teatro do Noroeste, falou do presente e do futuro, e anunciou que está a traballar nunha nova obra para decembro. «Eu cando penso en futuro, penso en mañá. Hai que ir día a día, mes a mes, e ir vendo o que se pode facer. Mentres teña cabeza para seguir lembrando textos, eu quero seguir nas táboas», dixo a veterana actriz ferrolá.
Darío Autrán e Sabela Hermida, director e actriz protagonista, respectivamente dO cuarto de Mona, presentaron un das dez estreas mundiais que acolle a 26 edición do festival. A película, que segundo o seu director e guionista pode definirse como «unha traxedia desde o prisma da comedia», conta tamén no seu elenco con Melania Cruz, Manuel Manquiña, Isabel Blanco, Pedro Pico e Rosalía Castro.
Trece pases e un concerto
O programa do OUFF oferta hoxe trece opcións para gozar en pantalla grande. A máis madrugadora será a opción familiar ao mediodía con Earwig e a bruxo, no Auditorio. As dúas salas da Ponte Vella repártense cinco das proxeccións da sección oficial -Uzi, Mediterráneo, Playground, Listen e A ruleta da fortuna e a fantasía- e o pase dA vida dos demais, Globo de Oro á mellor película do Festival de Berlín do pasado ano, que se ofrece dentro do ciclo Inédito en Ourense, no que se recollen cintas que nunca foron proxectadas na provincia. O balneario de Battle Creek, do ciclo Cine e Auga, poderá verse na sede do Cineclube Pai Feijoo, na Biblioteca Pública, onde tamén se proxectarán dúas sesións de curtametraxes. O principal acolle os pases dO verdugo e Esa parella feliz, dentro do ciclo de homenaxe a García Berlanga, ademais de Onde acaba a memoria, incluída na sección Cine e Literatura.
Ademais, dentro das actividades paralelas, a praza Maior acolle, desde as 12.00 horas, un concerto da Banda de Música de Lalín que ofrecerá unha selección de bandas sonoras.