Se o Concello concreta o proxecto, o Igape podería axudar a financialo
25 novs 2020 . Actualizado ás 10:14 h.Foi unha das promesas estrela do Partido Popular na campaña das autonómicas do ano 2016 e tamén, máis recentemente, nas do pasado mes de xullo. Con todo, a construción dun gran hotel balneario na capital ourensá segue sen concretarse e tampouco aparece ningunha partida específica nos orzamentos para o ano 2021 que o goberno liderado por Alberto Núñez Feijoo acaba de presentar para o seu debate parlamentario. A oposición fala de promesas «incumpridas», pero o executivo asegura que mantén a súa aposta polo proxecto e, en caso de poder concretarse ao longo do ano que vén, o Igape (Instituto Galego de Promoción Económica) financiaríao.
O delegado territorial da Xunta en Ourense, Gabriel Alén, explica que a demora se debe á falta de concreción por parte do Concello. É necesario aclarar a localización e resolver os problemas urbanísticos que poidan xurdir con esa elección, tendo en conta que o PXOM está pendente de aprobación e a cidade réxese por unhas normas do ano 1986. «É un proxecto non desenrolado porque falta por definir ou onde e ou como e iso é algo que ten que decidilo a cidade de Ourense», sinalou Alén, que lembrou que se trata dunha iniciativa que tamén debe contar con impulso privado. Aí é onde entraría o Instituto Galego de Promoción Económica.
«O Igape ten financiamento suficiente como para impulsar unha iniciativa privada de interese estratéxico para un territorio como sería esta», explicou Alén, que insistiu en que o principal problema agora mesmo é a «falta de concreción» respecto da localización do balneario. Se fose posible aclarar ese punto ao longo do ano 2021, aínda que non exista partida específica nos orzamentos da Xunta, o financiamento para o proxecto podería abordarse a través do Instituto Galego de Promoción Económica, lembrou o delegado territorial.
Monterrei
Outro dos proxectos que tamén botou en falta a oposición no proxecto orzamentario presentado esta semana é o parque acuático de Monterrei. Neste caso, moi recentemente adxudicouse a redacción do proxecto e eses traballos rematarán ao longo do ano 2021. As obras comezarán nese mesmo exercicio, segundo asegurou Gabriel Alén. Aínda que non haxa unha partida específica con ese título, os gastos correspondentes a esa actuación executaranse o ano que vén con cargo a unha xenérica para obras que ten prevista a Secretaría Xeral para o Deporte.
O goberno autonómico mantén intacto o seu compromiso con este proxecto, remarcou o delegado territorial do goberno autonómico. Segundo lembrou, as obras executaranse por fases e o proxecto completo podería estar finalizado no ano 2023.
A provincia, á cola en investimento para desenvolvemento de chan empresarial
Os orzamentos presentados polo goberno galego para o ano 2021 inclúen unha partida de 2,7 millóns de euros para o desenvolvemento de chan empresarial. Unha moi pequena parte dese diñeiro irá a para á provincia. Un 78,26 % consignouse para Pontevedra e o resto repártenllo as outras tres de modo que á de Ourense correspóndelle un 7,25 %. A pesar diso, A Coruña recibe aínda menos (un 3,62 %).
Tamén saen máis beneficiados outros territorios da comunicade no que se refire ás previsións de construción de vivendas de promoción pública. Nesta área hase consignado unha partida de 7,7 millóns de euros para o ano 2021. Neste caso, a maior parte do diñeiro quedará na provincia de Pontevedra, que absorbe un 81,42 % do total. A de Ourense tan só recibirá un 1,23 %.
Zonas vellas
Por outra banda, o goberno galego ten en marcha un programa (o Rexurbe) para a compra de edificios de centros históricos para a súa rehabilitación. No caso da zona histórica de Ourense adquiríronse xa varios e no ano 2021 prevese unha partida de 10 millóns para continuar con este proxecto en toda Galicia. Máis da metade dese diñeiro (un 52 %) quedará na provincia da Coruña e outro 31 % será para a de Lugo. A de Pontevedra terase que conformar cun 2 % e a de Ourense, con algo máis, concretamente un 15 %.