Cre que o centro está perfectamente integrado na cidade e que é un complemento ao comercio local
08 dic 2019 . Actualizado ás 05:00 h.Marcos Vila (Ourense, 1977) é o xerente do único centro comercial que existe na cidade. Tras sete anos no cargo, coñece de corrida un modelo de éxito que acaba de cumprir a maioría de idade con practicamente o 100 % das persianas do espazo situado ás ribeiras do río Miño abertas.
-Cal é a saúde de Ponche Vella tras 18 anos de andaina?
-Ten unha saúde moi favorable. Foi no seu día unha gran idea de comerciantes de Ourense que se xuntaron dun xeito pioneiro naquel momento para idear un centro comercial. Acertaron en elementos moi importantes, como a súa localización no centro da cidade, algo que non era moi habitual e segue sen selo agora. O evitar irse a un polígono industrial o que conseguiu foi unha complementariedade co comercio local.
-Como logrou escapar este centro comercial da crúa realidade que viven outros espazos? Axuda o non ter competencia directa?
-Temos o exemplo de Lugo, que é unha cidade dun tamaño similar, e que abriu fai catro anos o centro comercial Abella e xa pechou por completo. É moi importante que haxa certo equilibrio entre a oferta e a demanda e en Ourense deuse. Ponche Vella está perfectamente integrado na cidade e, sinceramente, creo que un exceso de centros prexudica extraordinariamente ao pequeno comercio. Hai cidades, con exemplos próximos, nas que houbo unha proliferación de centros e iso debilitou moito o comercio na cidade.
-En Ourense por diferentes motivos quedaron polo camiño proxectos de centros comerciais, cre que hai mercado para máis espazos destas características?
-Intentando falar con obxectividade, realmente estou convencido de que non hai sitio para outro centro comercial en Ourense. Somos 107.000 habitantes na cidade e algo máis de 300.000 na provincia. Non hai poboación para máis centros comerciais en Ourense. A Asociación Española de Centros Comerciais sempre recomendou unha poboación de 250.000 persoas para un centro destas dimensións. Realmente, creo que non hai sitio para outro centro deste tipo. Ao final, o primeiro afectado sería o comercio local e aí temos o exemplo de Lugo.
-Valoran ampliar a súa oferta?
-Creo que temos un equilibrio positivo entre o lecer e as tendas. Sempre intentamos traer o mellor posible e estar na vangarda das novidades, sempre dentro do espazo que dispomos e das necesidades que pode haber en Ourense. Estamos abertos a calquera novidade.
-Hai poucos cambios de negocios. Veo positivo?
-Temos unha porcentaxe de ocupación que sempre rolda do 100 %. Os poucos movementos que tivemos neste sentido nos últimos anos, entendemos que foi a mellor. Ao haber poucos peches, iso facilita que se consolide a oferta.
-Facer máis atractivas as terrazas é unha materia pendente?
-Aprovéitase a nivel de lecer, sobre todo, coa pista de xeo. A zona de restauración tamén se utiliza cunhas vistas espectaculares que impresiona moito aos turistas pola súa panorámica da ponte Romana e do río. Hai outra terraza, que é a superior, que é menos coñecida e que se aproveitou moi pouco e si que nos gustaría dotalo de actividades que sexa un atractivo para os visitantes.
-Que retroalimentación teñen dos clientes?
-En xeral, é unha valoración moi positiva a que recibimos. Ao ter unha xunta directiva con xente ourensá, con Jorge Bermello á fronte, estamos totalmente impregnados da realidade da nosa provincia e sociedade. Iso o que nos leva é a buscar o mellor posible para Ourense e a resposta que recibimos é moi positiva, pero sempre pensando en mellorar e en buscar novas opcións de lecer.