O equipo de mecánicos do ourensán Talleres Craf acudirán en xuño á final mundial organizada por Renault Trucks, que será en Lyon (Francia)
01 may 2019 . Actualizado ás 21:22 h.O equipo 8barreirostrucks, de Talleres Craf Ourense, representará a España, xunto con outro taller madrileño, na final mundial na que se avaliará aos mellores equipos de taller da rede Renault Trucks, que será en Lyon (Francia) o 24 e 25 de xuño. O taller ourensán, situado en cálea seis do polígono industrial de San Cibrao, proclamouse campión nacional tras medirse inicialmente a 135 equipos de toda España: Cinco deles -o ourensán, o madrileño e outros de Salamanca, Segovia e Murcia- acadaron a final, que se celebrou a semana pasada no centro de formación que a marca francesa do rombo ten en Leganés (Madrid).
Manuel Ruiz, xerente de Talleres Craf, explica que é o segundo ano que concursan: «Xa fomos no 2017. A competición celébrase cada dous anos. Durante o ano vanse facendo varias probas, con preguntas online, sobre distintas reparacións e os que conseguen maior puntuación pasan á fase final en Madrid, onde lles poñen cinco camións, nos que deben pescudar e solucionar cada avaría».
Na final internacional de Lyon, ademais dos equipos ourensán e madrileño, competirán outros 22 establecementos oficiais da marca do rombo de todo o mundo. Presúmese que esta final internacional será aínda máis difícil pois o campionato RTEC (Road To Excellence Championship) contou cunha participación total de 6.134 participantes, integrados en 1.642 equipos de 86 países.
Despois de ter acadado a final no 2017, na que quedaron cuartos, o equipo ourensán de Talleres Craf ía «ilusionado» á proba deste ano e preparado para a competición, na que ademais de valorar que a avaría estivese ben resolta, tamén contaba a rapidez con que se fixese a reparación. Os compoñentes do equipo, que son todos ourensáns, levan desde mozos sendo mecánicos do taller de Renault Trucks, incide Manuel Ruiz. Porque para superar este tipo de probas hai que ser mecánico especialista con anos de formación. «A empresa ten 39 anos e esta xente do equipo viñeron como aprendices con 18 ou 19. Fixeron aquí a súa formación e levan aquí toda a vida», especifica o xerente.
Cinco talleres específicos
Os competidores debían completar cinco talleres para demostrar os seus coñecementos. As probas de reparación real que tiveron que superar na final incluían a comprobación electrohidráulica do sistema de dirección, a revisión de sistemas electrónicos e de alimentación eléctrica, a comprobación da caixa de cambios Optidriver, a verificación do sistema de freos EBS, as baterías, o proceso do servizo 24/7, o de xestión de mantementos, de recepción dinámica ou a estación virtual do motor DTI 11. O equipo estaba composto polo xefe do taller, dous mecánicos e o xefe de recambios. Tamén acudía o xefe de posventa como representante do grupo.
Os membros do equipo ourensán dedicaron o triunfo a un compañeiro recentemente falecido, Marcial Fernández Prieto. «Marcial, vai por ti», dixo o portavoz do emocionado equipo ourensán, ao ser proclamado campión da final nacional.
Membros do equipo. Antonio Nespereira Astray, Marco Antonio Rivo Rodríguez, José Luis Domarco Casas, Gumersindo Fariña González e Víctor Manuel Meleiro Fernández foron os integrantes do equipo gañador.
Traxectoria. Os mecánicos formáronse en Talleres Craf e no 2017 foron cuartos na final nacional. Este ano ían se cabe máis ilusionados e dedicaron o triunfo a Marcial, un compañeiro falecido.