A cantante Katy Perry recibiu recentemente unha avalancha de odio nas redes. A razón? Non a hai, pero a escusa é a súa excursión lóstrego (durou pouco máis de dez minutos) ao espazo con outras mulleres nun foguete de Jeff Bezos, o dono de Amazon. Un pode ter moitas obxeccións a este tipo de espectáculos, pero cando foron homes os que se deron un paseo parecido, non ocorreu nada semellante.
A intérprete de I kissed a girl, Firework ou Hot n Cold respondeu así aos haters: «Cando o mundo en liña intenta converterme nunha piñata humana, tómoo con graza e envíolles amor». E definiu internet como unha «entulleira para exasperados».
A mensaxe é demoledor. E certeiro. Define unha realidade alternativa preocupante. En canto alguén sobe algo á Rede, irrompe a horda do odio con comentarios que serían inaceptables na vida cotiá, por irrespectuosos e insultantes. Case sempre os vomitan baixo o paraugas do anonimato, e moitas veces non teñen ningunha relación co contido orixinal ao que se reacciona. Impórtalles o que faga ou escriba alguén? Non. Só buscan unha oportunidade para soltar bilis, para buscar carroña nas vidas alleas. É humano? Si. Pero sempre podemos ser mellores e evolucionar, como sociedade e como persoas. Vímolo o día do apagamento. Sen redes, respondemos de forma sensata, mesurada e admirable.