Levamos unhas semanas cos medios saturados cos ataques dun ecosistema político ao proxecto industrial de Altri en Palas de Rei, que ata hai pouco máis dun mes era a xoia da coroa do futuro económico de Galicia. Todo o arco parlamentario de Galicia apoiábao.
A Ulloa, unha comarca en proceso de despoboamento, cunha media de idade de sesenta anos e da que foxe a poboación nova por falta de oportunidades, atopouse no seu camiño cun proxecto industrial con futuro, ecolóxico, innovador, que busca eliminar gran parte do poliéster da industria téxtil; un proxecto que creará na fase de construción do complexo industrial 4.000 empregos e na súa operación, 550 directos e de 2.000 a 2.500 indirectos.
A Ulloa está a soñar cun futuro de benestar e desenvolvemento para todos os veciños. Un futuro no que as avoas poidan ver crecer aos seus netos no pobo, un futuro en que os mozos poidan exporse traballar na súa comarca, un futuro en que se constrúan parques infantís e garderías, onde haxa oficinas bancarias e servizos que dean atención a unha poboación rexuvenecida e crecente.
Nunha liña xa coñecida de «desenvolvemento si, pero só baixo o meu control», o ecosistema político e social de sempre decide asestar a enésima «navallada» ao futuro de Galicia, ao futuro das zonas deprimidas do campo.
Recordo cando se nos falaba do «autoodio», un sentimento de complexo de inferioridade que se nos achacaba aos galegos. Parece esta actitude unha versión renovada dese «complexo de inferioridade». Algúns consideran que en Galicia non é posible desenvolver proxectos industriais e innovadores se non son malignos ou pretenden roubarnos; consideran que Galicia só merece un futuro ancorado sobre o sector agrario (se é posible, pouco desenvolvido tecnoloxicamente) e o sector servizos (pór cocidos a peregrinos e poida que ser funcionarios). Preténdennos arrastrar cara a unha «Galiza» inexistente e imposible, en que se vivirá ben por encantamento e non pola xeración de valor engadido.
A Galicia real é outra, é unha Galicia que quere desenvolver e recuperar peso industrial aproveitando os seus recursos naturais, creando industrias innovadoras, recuperando os seus talleres téxtiles e vertebrando o medio rural abandonado durante décadas para facelo próspero e atractivo.
E a Galicia real perdurará, con orgullo.
Francisco Méndez é Responsable de Estratexias Industriais de CC.OO. de Industria de Galicia