Rede de estradas do Estado en Galicia: deixamento e abandono absolutos
OPINIÓN
Resulta sorprendente, por non dicir incomprensible, o anuncio do Ministerio de Transportes que limita as súas previsións de intervención en Galicia a unhas puntuais actuacións na A-6, iso si, sen mencionar nin comprometer prazos en relación co viaduto pendente de execución.
As principais vías de comunicación de Galicia coa meseta (A-6 e A-52 e N-120) e co norte de España (A-8) atópanse nun absoluto estado de abandono por parte do Ministerio de Transportes. A A-54 segue executándose con contagotas (abonda lembrar que o primeiro tramo, Santiago-Lavacolla, é do século pasado) e o que é evidente é que a este ritmo de execución non estará finalizada este ano 2024.
Hai dous anos derrubábase o viaduto da A-6 (no Castro) e, entre outros compromisos con Galicia, o ministerio prometeu informarnos da causa do derrumbe, que no 2023 estaría operativo o viaduto en dirección Madrid, no 2024 en dirección Galicia e que de modo inmediato se articularía unha solución provisional para a zona de Pedrafita, propondo desviar tráfico pola N-120 e saír á meseta polo Barco de Valdeorras e facer un viario de desvío.
Desde Fegatramer expúxoselle a inconveniencia do desvío previsto (pola súa excesiva pendente, que padecemos no inverno do 202 ) e a imperiosa necesidade de reparar o firme da A-52 (única autovía operativa cara á meseta), da N-120 (que o ministerio propuña como alternativa), así como o da propia A-6. Todas eles co firme nun lamentable estado de conservación. O secretario de Estado de Infraestruturas comprometeuse a que de modo inmediato se repararía o firme da A-52 e actuaríase sobre as zonas deficientes das outras vías.
Dous anos despois, na A-6, aínda que se abriu o viaduto en dirección Madrid (aínda pendente de impermeabilización, reparación de taludes e outros acabados), nada se fixo en relación co firme, que segue impracticable (en especial, na saída de Arteixo e desde Baralla a Benavente). Do viaduto en dirección Galicia nada sabemos, nin sobre as previsións de execución e acabado.
Na A-52 non se acometeu ningunha actuación (o firme na zona de Xinzo de Limia, Verín e toda a saída de Ourense a Zamora, incluso o tramo Puebla de Sanabria-Benavente, están gravemente danados) e o mesmo ocorre coa N-120, que segue nun estado lamentable, constituíndo estas deficiencias do firme un verdadeiro problema para a seguridade viaria, en especial para os camións.
A pesar dos moitos anuncios e compromisos, seguimos pagando unhas peaxes brutais na AP-9 e na AP-53, e a A-8, ademais de problemas de firme, carece de áreas de descanso. Para o sector de transporte de mercancías o balance é moi negativo e unha vez máis se pon de manifesto que Galicia non está entre as prioridades do Ministerio de Transportes nin deste Goberno.