A costa hase enchido de lixo mentres aínda nos doemos da última resolución británica que nega a España o dereito a cobrar polo Prestige. Ademais das eleccións, o que se resarzan os danos e non se repita o fracaso tamén ten o seu interese pero, de novo, saímos en axuda do contrario. O barco Toconao ten bandeira de Liberia, a armadora e outras empresas implicadas son de Bermudas, Chipre, Dinamarca ou Polonia. A lista de actores non está pechada e esta é a maraña habitual. O Xulgado de Noia e a Fiscalía investigan se a vertedura pode ser delito e as súas indagacións servirán para pedir danos no xuízo penal se chega. Tamén poida que as aseguradoras soliciten arbitraxe noutro país; un proceso máis áxil e no que o sistema anglosaxón ten máis peso que o noso.
É pronto para saber cal será o camiño pero os primeiros movementos estratéxicos están en marcha e teño ese sentimento de cando, en xuízo, ofrécese ao cliente o dereito á palabra e, contra todo consello, úsao e prexudícase sen remedio.
O 20 de decembro a armadora recoñeceu a perda de carga e púxose a disposición de España para o pagamento da limpeza. Podo afirmar que cada declaración e acción da armadora responden a un só obxectivo: o control de danos e limitar a súa responsabilidade.
Mentres, os nosos políticos levan semanas acusándose do que non se fai, atrasando decisións, fallando en coordinación, realizando afirmacións contraditorias sobre se son tóxicos ou afectan ao medio ambiente, ou se os medios para localizar os sacos que non rebentaron son necesarios ou non.
Os equipos xurídicos daqueles aos que pediremos contas toman nota de cada palabra. Cada vez que un cargo español acusa de neglixencia a outro para achegar algo á súa campaña electoral, consegue que un letrado internacional sorría. Logo, pulsará o botón de arquivo do artigo ou vídeo que, no seu momento, achegará para afirmar que o dano puido limitarse e o que fallou foi España. E como proba impagable presentará as palabras dos nosos representantes que, incapaces de presentar unha fronte unida, axudan a Toconao mentres nos piden o voto.