Non é o Prestige. Por moito que a esquerda teña entrado a saco no tema dos plásticos que invaden as praias de Galicia e que estea a intentar resucitar a indignación dos tempos nos que o fuel campaba ás súas anchas pola costa galega, non, os pélets non son o Prestige do 2024.
Sen querer restar importancia á vertedura dos plásticos e ás obrigacións que cada Administración teña con respecto á limpeza deste material, atopámonos ante un caso claro de chapapote político, no que a oposición intenta como sexa botar ao PP da Xunta e no que as redes sociais protagonizaron excesos que teñen como única finalidade desgastar ao partido no poder.
Este é o escenario. Ana Pontón, que non se ve tan lonxe da posibilidade de gobernar, pero que sabe que agora mesmo non lle dá, intenta sacar tallada pondo en evidencia tanto ao Goberno central como ao autonómico e facendo ver que ela é a única alternativa que, de verdade, mira por Galicia. Mentres, Besteiro, en terceira posición nas enquisas, pero apoiado polo primo de Zumosol de Pedro Sánchez, cre que pode rabuñar uns puntos ao PP se sementa a sombra da dúbida sobre a súa xestión neste asunto.
E o PP? Intentou pórse de perfil ante a situación e pretende facer ver que desde Madrid se está xogando sucio e que todo o que sucede non é máis que a politización dun incidente grave, pero non catastrófico, algo no que, a tenor dos datos que temos ata agora, ten razón.
Son os tempos que nos toca vivir, nos que os partidos políticos son implacables á hora de afrontar a contenda cos seus adversarios. Dá igual mesturar verdades irrefutables (Galicia sofre un problema de contaminación na súa costa) cunha gran mentira (Galicia sofre outro Prestige coa mesma nefasta xestión de entón).
E pode este tema derrubar o muro da maioría absoluta do PP? Parece difícil. Ata a chegada dos plastiquitos, non se observaba en Galicia unha pulsión de cambio. Máis aló do típico discurso da oposición no que se debuxa a un Rueda como líder dun proxecto esgotado e desnortado, non se aprecian na sociedade galega síntomas de chea con respecto ao actual Goberno da Xunta.
Todas as enquisas realizadas ata agora outorgan a maioría absoluta a Alfonso Rueda. No caso de Sondaxe, son 39 os deputados que lle dan os galegos. Sin duda, suficiente para repetir mandato. Pero non unha vantaxe tan elocuente como para desanimar aos adversarios. De aí vén a intensidade coa que se están aplicando o BNG e o PSdeG, especialmente os nacionalistas cunha Pontón lista e traballadora que visita as praias e está omnipresente.
Resulta difícil pensar que a marea de plásticos poida descabalgar ao actual Executivo. Só unha nefasta xestión do tema podería levalos a perder os votos suficientes para que se dea este cambio. Porque, ata agora, é obvio que os 26.000 quilos de pélets non son as 62.000 toneladas de fuel do Prestige.