Vivimos en realidades paralelas. Cada mañá, cando nos levantamos, preparámonos o almorzo e revisamos as noticias nos diversos medios de comunicación, asumimos que o que acontece no mundo é verdade, pero que en pouco ou en nada nos afecta. E poida que sexa certo un 98 % das veces, pero o 2% restante, por moi inverosímil que pareza, ten unha gran transcendencia na nosa vida. Porque, máis aló das súas intervencións visibles nas rúas das nosas cidades, os corpos e forzas de seguridade do Estado son a gran muralla que nos separa e protexe dos criminais e do caos.
De igual modo, os servizos de información, en realidade de espionaxe , son os que se encargan de detectar e eliminar as grandes ameazas que o cidadán nunca percibe salvo que se produza unha gran fenda. E aínda que puidese parecer que, unha vez caídos o muro de Berlín, o pano de aceiro e rematada a Guerra Fría, xa non teñen sentido axentes 007, o certo é que os perigos seguen axexándonos, entre os nosos cando algúns venden información, ou fóra, como en Ucraína , en guerra co xigante ruso.
Que llo pregunten a Marianna Budanova, esposa do tenente xeral Kirilo Budanov, xefe dos servizos secretos da intelixencia militar ucraína, que mantén en xaque aos seus homólogos rusos. Marianna, tivo que ser ingresada de urxencia tras ter sido envelenada por metais pesados. Xa sabemos que os espías e contraespías rusos teñen debilidade polos envelenamentos, xa sexan rápidos ou estendidos ao longo do tempo, como parece ser o caso de Budanova, quen non foi a única ucraína atacada pero talvez si a que captou máis atención mediática. Aínda que o seu marido puidese parecer o obxectivo principal, ela tamén é unha persoa moi influente, xa que é asesora do alcalde de Kiev. En calquera caso, as alarmas saltaron en Ucraína. Non se descarta que vellos elementos do KGB reconvertidos en espías do SBU ucraíno aínda sexan leais ao Kremlin, un risco extremo que deben atallar nunha guerra paralela á que se libra na fronte de batalla. Por fortuna, Marianna xa se está recuperando.