Xa é mala sorte que este ano a gripe veña con máis mala uva da habitual e deulle por atacar con máis forza nas festas do Nadal, para coller coa garda baixa ao persoal e colapsar aínda máis os servizos de urxencias dos hospitais.
O escaso tacto e falta de oportunidade dos virus invernais deu ocasión aos que sempre ven a botella medio baleira para montar protestas e peches contra a deterioración da sanidade, que afirman vén producindo desde hai anos, e ata a responsables de servizos de urxencias para levar a auga ao seu muíño e pedir que se desatasquen outras áreas hospitalarias, de modo que os pacientes xa atendidos non se pasen horas e mesmo días nos corredores de urxencias agardando simplemente a que quede libre unha cama.
A irresponsabilidade dos xermes que fan o seu agosto no inverno debuxa a ocasión perfecta aos que gustan de lembrar con machacona insistencia os milleiros de prazas de sanitarios que se recortaron durante a crise, o continuado descenso do gasto en sanidade con relación ao PIB -xa son ganas de complicar as cousas- que baixou desde o 6,5% do 2011 ata o 5,8 % previsto para este ano, a elevada temporalidade nos contratos e a dificultade de lograr unha asistencia de mínima calidade cando un terzo dos contratos que se asinan duran unha semana.
E ata hai quen ve relación e intencionalidades ocultas entre a deterioración da sanidade pública e o crecente peso da privada. Xa son ganas de complicalo todo. Debe de ser cousa da febre que produce esta gripe traizoeira e inoportuna.