Todo é silencio no Racing Club Ferrol: «Non estaría de máis algo de información»

«Falar pouco e traballar moito». A premisa á que se encomendou cando xa pintaban bastos o cesado técnico do Racing Club Ferrol Cristóbal Parralo parece asentarse na Malata. E é que, despois de consumarse o descenso a Primeira Federación e ao contrario que a estratexia doutros clubs como o Tenerife no que compareceu o seu director xeral Felipe Miñambres, na fragata verde parece imporse a lei do silencio.

? Rolda de prensa de #FelipeMiñambres#SiempreCDTenerife

— CD Tenerife ??????? (@CDTOficial) May 13, 2025

O racinguismo está á espera dunha presentación detallada do proxecto da nova cidade deportiva, seguindo o exemplo do Castelló; de coñecer se haberá algún tipo de reestruturación ou ampliación no organigrama da dirección xeral e/ou deportiva e de se o club optará por unha renovación parcial ou total do persoal, entre outras cuestións.

iago rodríguez

Aposta pola masa social

E, segundo sinala Iago Rodríguez da Pena D'Tapas, aínda que confía en que os estamentos superiores do club non está de brazos cruzados, si sería tranquilizador algún tipo de pronunciamiento institucional. «Para acougar as augas e intentar motivar á xente, non estaría de máis dar algo de información á xente. Todos supomos que se están dando pasos, pero estaría ben que se saíse polo menos a pedir desculpas», determina antes de deixar claro que el entende que será Carlos Mouriz no encargado de comandar a reconstrución. «Os resultados de Mouriz en Primeira Federación son sobradamente coñecidos e, aínda que fun crítico con el, é do mellor que pode ter o club e é a persoa idónea», reflexiona antes de sinalar que o que lle gustaría é que lle liberasen das responsabilidades que entraña compaxinar a dirección xeral coa deportiva. «Alguén do consello que adquirise outras funcións e que Mouriz puidésese cinguir ao deportivo porque a unha persoa soa fáiselle moi grande», profunda. Entende, ademais, que se o club leva a cabo unha boa campaña non haberá desbandada total no que a masa social refírese.

«Son optimista, creo que andaremos sobre os 7.000 abonados. Outra cousa son as entradas ao estadio, que terán os seus máis e os seus menos», explicita. O gran reto das penas será, avanza, o de volver mobilizar ao racinguismo na Malata e nos desprazamentos para animar a un equipo no que, confesa, «quedaríame como moito a dous ou tres e máis que nada polo que representan para o equipo e a cidade».

santiago veo de antelo

A sumar desde a capital

 Desde a capital, en representación da Pena Enxebre, móstrase plenamente confiado Santiago Velo de Antelo, que apunta que preferiría que o club avanzase en dotarse de infraestruturas necesarias como a cidade deportiva antes de regresar ao fútbol profesional. «Xa virá. Cada club ten o seu ritmo e chegará esa intervención oficial», indica sobre a postura do club de manter un perfil baixo. Ademais, lembra, a súa pena xurdiu cando o club ferrolán descendeu a Terceira e, a pesar de que entende que o ambiente sexa desazón, non fallarán os enxebres nos desprazamentos en Primeira Federación e especialmente se no grupo coinciden equipos próximos xeograficamente á capital.

«O apoio a un club a 600 quilómetros de distancia non che motiva o estar nunha categoría mellor ou peor. O concepto é outro e nós, se temos sorte e toca o grupo de Madrid, o Racing non estaría só», engade antes de apuntar que el, a nivel persoal, tamén apostaría por un borrón e conta nova no persoal a excepción, aprecia, «dun par de veteranos para que tiren un pouco do vestiario».

fran rodríguez

Claridade para saír do bucle

Fran Rodríguez, da Pena Marea Verde, tamén bota en falta que alguén do club diga esta boca é miña. «Estou a ver unha falta moi grande de autocrítica. Nin unha comparecencia en cinco meses e esta desidia o que produce é ansiedade na afección», determina. Máis optimista móstrase co músculo social e confía en que non haxa sangría de socios. Rescataría, destaca, a dous ou tres xogadores «que xa son marca Racing» e, no seu caso, aposta por Carlos Mouriz como director xeral e un novo rumbo na parcela deportiva para ir dando pasos cara á profesionalización. «Sabemos que Mouriz é moi de respectar os tempos e ata o 30 de xuño nada, pero a xente necesita un xute de enerxía. Levamos en letargo meses», gabia defendendo que a saída do curso da marmota pasa por romper o xeo, tomar a palabra e endereitar o rumbo.

---

---

---