A empresa compostelá SunRock está dedicada á transformación de investigación en fármacos baseados en anticorpos, centrada en cancros agresivos e enfermidades inflamatorias
17 ago 2025 . Actualizado á 05:00 h.O clima e as súas praias fan que sexa recorrente falar da comunidade galega como Galifornia, nunha clara referencia ás súas similitudes coas costa oeste estadounidense. O estado norteamericano é punteiro en biotecnoloxía e profesionais deste ámbito en Galicia soñan con ser referente ibérico tamén neste segmento. Entre eles atópanse os fundadores de SunRock, compaña fundada en Santiago hai máis de dez anos e dedicada á transformación de investigación en fármacos baseadas en anticorpos, centrada en cancros agresivos e enfermidades inflamatorias: «A nosa misión é converter ciencia en terapias útiles, cubrimos o oco entre a investigación académica e a transferencia real de coñecemento ao mercado en forma de tratamentos oncolóxicos de nova xeración», explica Juan Buela, o seu xestor. Desenvolven tratamentos en etapas clínicas iniciais e, cando están validados, licéncianos a grandes farmacéuticas que os levan ao mercado.
Esta compaña con sede no Biopolo A Sionlla traballa actualmente con varios principios: un anticorpo para enfermidades inflamatorias intestinais como a colitis ulcerosa ou a enfermidade de Crohn; un ADC (conxugado anticorpo-fármaco) para cancro de ovario e páncreas, que desenvolven en colaboración con EscuGen; e un HER3, centrado en tumores resistentes.
O impulsor do proxecto é Laureano Simón, licenciado en Farmacia pola USC e doutor en Ciencias Químicas (Bioloxía Molecular) pola Universidade Autónoma de Madrid, con experiencia internacional, e que exerce como máximo responsable. O equipo directivo complétano Pablo Garrido como e o propio Buela. A compaña conta cun grupo de seis doutores en ciencias da vida, en áreas como a biotecnoloxía, a farmacoloxía e a bioloxía molecular, «o que nos permite abordar o desenvolvemento de anticorpos terapéuticos cunha visión integral, rigorosa e orientada á innovación, apoiada por persoal especializado en xestión», engade Buela.
Factor diferencial
Tres aspectos marcan o factor diferenciador desta compaña no mercado, segundo o seu directivo: a especialización extrema nas dianas terapéuticas nas que traballa e os anticorpos que validan contra elas; o modelo de innovación aberta, colaborando con universidades, centros de investigación e empresas de alto nivel; e o modelo de negocio, «que transforma ciencia en activos licenciables sen necesidade de converternos en farmacéutica comercial convencional».
O seu capital é maioritariamente galego, a través de Permedika e Xes Galicia; e tamén participa o Banco Europeo de Investimentos, a través do fondo Helenes Ventures. E, aínda que é moi internacional, o propio nome da firma, fai unha clara chiscadela á súa esencia galega: «Co espírito de crear unha Galifornia da biotecnoloxía, Laureano, que é de Pontevedra, propuxo facer unha homenaxe a San Roque, buscando un nome que chamase a atención e funcionase en inglés».
Desde a súa fundación, elixiron Santiago como sede polo seu nivel científico, a proximidade a grupos punteiros de investigación, os custos operativos e o apoio institucional. «Galicia é un polo emerxente en biotecnoloxía e cremos en construír valor desde aquí cara a fóra», subliña. De feito, son socios do Clúster Bioga, que representa o ecosistema biotecnolóxico da comunidade.
Con todo, o seu mercado é global, co foco en Europa, EE. UU. e Asia. Si. «Os nosos principais acordos, licenzas e colaboradores están fóra de España», detalla o directivo, e explica que teñen relacións estables con socios en Suíza, EE. UU., Francia, Alemaña, Reino Unido, Xapón e China.
SunRock iniciou a súa andaina no ano 2014 con dúas persoas no seu equipo traballando nun proxecto para tratar con anticorpo anti-CCR9 nunha variante ultras rara de leucemia; e pasou a consolidar unha empresa con seis doutores e tres licenciados, todos eles cunha grande experiencia nos seus campos. É unha empresa que conta ademais cunha metodoloxía de desenvolvemento e validación propia. En dez anos ver «con varios produtos licenciados, ingresos recorrentes por royalties e unha gran capacidade para financiar e desenvolver ata fases clínicas múltiples liñas de innovación».