O perfil das persoas que axudan con máis de 5.000 euros ao ano a causas solidarias é o dun traballador acomodado, pero cun importante patrimonio e desafogo económico
14 oct 2023 . Actualizado á 05:00 h.A Asociación Española de Fundraising (AEFr) acaba de lanzar o primeiro estudo que se publica no país para analizar o perfil dos grandes doantes das oenegués. Esta primeira edición do Barómetro da filantropía privada revela que os grandes doantes, que son aqueles que achegan máis de 5.000 euros a causas solidarias, non son só persoas ricas. Ben ao contrario, o perfil é máis ben o dun fogar de clase media ou media alta onde as rendas do traballo son o principal ingreso e moitas veces o único. Iso si, pertencen a familias cun nivel patrimonial considerable e que contan con desafogo en termos económicos. O 50% son homes e as 41% mulleres —o 9% non precisan o dato— e a idade media sitúase entre os 50 e os 70 anos. A 85% conta con estudos superiores, dous terzos deles están casados ou viven en parella e só a metade teñen fillos ou persoas ao seu cargo.
A realidade é que os grandes doantes só representan o 0,03% dos filántropos, mentres que os de nivel medio alto son o 0,02%. Ese 0,05% que forman ambos os segmentos supón o 1,8% do total de ingresos das oenegués. A pesar de ser unha minoría, trátase dun fenómeno en alza, xa que entre o 2017 e o 2021 o número de doantes con gran capacidade económica creceu un 11% en España, ao pasar de 7.223 a 8.057 os que fan achegas de nivel medio alto, entre 3.000 e 5.000 euros, e de 319 a 354 os que superan os 5.000 euros.
No estudo participaron 16 grandes oenegués asociadas á AEFr: Acción Contra a Fame, ACNUR, Anesvad, Axuda en Acción, CEAR, Cruz Roja Española, Fundación Josep Carreras, Fundación Pasqual Maragall, Greenpeace, Oxfam-Intermón, Médicos do Mundo, Médicos sen Fronteiras, Museo Nacional Thyssen-Bornemisza, Plan Internacional España, World Vision España e WWF. O resultado revela que a maioría dos grandes doantes concéntranse en Madrid (42,6%) e Cataluña (20,2%). Séguenlle País Vasco (8%), Andalucía (6,5%), Valencia (4,6%) e Navarra (4,2%), mentres que o resto das comunidades autónomas, entre elas Galicia, están todas por baixo do 3%.
O Barómetro da filantropía privada en España pon de manifesto que o factor determinante para converterse nun gran doante non é contar con elevados recursos económicos, senón máis ben os valores persoais, aínda que tanto o nivel de renda como o patrimonio si teñen unha influencia directa no nivel das achegas solidarias.
O estudo resalta, ademais, que un de cada catro grandes doantes é ademais colaborador dalgunha ONG, un nivel de implicación que é superior ao do resto de persoas que fan achegas filantrópicas de importes menores a 5.000 euros ao ano, que se sitúa nunha de cada cinco.
Outro dato que pon de manifesto o nivel de implicación dos grandes doantes das oenegués é que o 13% xa realizaron un testamento solidario, o que supón máis do dobre que o resto de socios e colaboradores das organizacións non gobernamentais.