Desde cromos e pósteres ata reliquias relixiosas: a Feira de Antigüidades de Sarria está para todos os petos
SARRIA
Os expositores aseguran que hai unha gran demanda polo vintage e as pezas de época, que se expoñen nesta feira. O evento conta, ademais, con unha variada oferta cultural, gastronómica e de lecer
04 may 2024 . Actualizado ás 18:31 h.Hai días que están marcados de forma inamovible no calendario de eventos do Concello de Sarria. Dous deles son os estes, nos que se celebra a Feira de Antigüidades e Restauración, que este ano se celebra os días 4 e 5 de maio e chega á súa 27 edición. Aínda que moita xente se achega a a localidade para visitar os anticuarios, este evento ten outros atractivos e conta con numerosas actividades que se desenvolven durante toda a fin de semana.
Sarria gañouse a fama polos seus anticuarios, abertos durante gran parte do ano e que tamén aproveitan a feira para mostrar a súa colección de antigüidades. Pero ademais, hai outros expositores que se achegan para ensinar e vender as súas pezas, moitas delas adquiridas ou mesmo propias, que gardaban nas súas casas de hai anos. Pódense ver diferentes tipos de mobles e abundan especialmente os enxovais. Desde ferros de roupa, vasijas, cubertería, máquinas de coser, reloxos, pezas de roupa feitas a man e lámpadas ata moedas e botellas de gasosa. Tamén hai expositores que apostan por ensinar cromos ou pósteres súper pop de hai anos que reavivan o recordo de varias xeracións.
Demanda polo vintage
Carmelina, unha das anticuarias máis recoñecidas de Sarria, que rexenta o que era o anticuario do seu pai Manuel Calzada, explica que vén xente de moitos lugares a propósito para visitar esta feira. Ás veces mesmo para conseguir pezas exclusivas que non atopan noutros lugares. Ademais, sostén que hai moita demanda polas pezas e a roupa de época, que conviven coa esencia moderna.
Exposición de bonsáis, talla de madeira, coches e carreiras
Ademais de antigüidades, tamén se poden adquirir produtos gastronómicos. Esta feira de Sarria coñécese pola gran oferta cultural que presta aos seus visitantes. A feira conta cunha exposición de bonsáis, da Asociación O Serbal, que se pode visitar os dous días que dura o evento, outra demostración de talla en madeira da Asociación Sarricanta, unha de cerámica a cargo do mestre ceramista Manuel Fernández López e tamén unha mostra de palillos da Asociación Palilleiras do Camiño de Santiago —esta está na Casa da Cultura—.
Sábado 4
O sábado ten tamén lugar o Rali de Regularidade Vila de Sarria, do Club Clásicos, e a carreira de obstáculos coñecida como Pretorian, na que hai máis de 500 inscritos. Pola tarde, actúa a Asociación Meigas e Trasgos da localidade.
Ademais, hai un taller de barro e un obradoiro infantil de elaboración de galletas con Lourdes Pombo, a cara visible de Sopapo de Sarria.
Domingo 5
O domingo hai un taller de cocción de cerámica. E péchase o evento coa actuación da Asociación Peleriños. A pesar do mal tempo, a feira está a ter boa acollida por parte dos visitantes. Explica Carmen, outra das anticuarias, que «a xente está moi interesada nas antigüidades».