Unha muller de Palas de Rei de 88 anos sufriu o roubo da súa cadea de ouro por este método
26 abr 2024 . Actualizado á 13:50 h.A Garda Civil de Lugo alertou este venres a través dun comunicado oficial da presenza de ladróns no Camiño de Santiago. Concretamente, a Comandancia informou de que se identificou á presunta autora dun delito de furto co método do «abrazo cariñoso» tras o roubo dunha cadea de ouro a unha octoxenaria na parroquia de Orosa, en Palas de Rei (Lugo).
Así o explica a Benemérita, que sinala que a vítima, de 88 anos, denunciou que, na tarde do xoves, cando se atopaba sentada nun banco que ten no exterior do seu domicilio, achegóuselle unha muller descoñecida. Tras conversar un intre, esta abandonou o lugar e, momentos máis tarde, a vítima deuse conta que lle falta a cadea de ouro que levaba ao pescozo.
Un método pensado para atracar a persoas maiores
A Garda Civil explica que se trata dun método mediante o cal os estafadores abordan a persoas, na súa maioría de avanzada idade, en plena rúa e de forma próxima e mesmo «cariñosa», para facerlles algunha consulta ou ben un ofrecemento.
«É entón cando aproveitan o contacto físico que se produce durante a despedida para roubarlles algún obxecto de valor que este ao seu alcance». Agora, a Benemérita continua coa investigación para esclarecer os feitos, identificar á autora e recuperar o obxecto subtraído.