Detido por forzar a porta dunha administración de Correos en Monterroso e roubar varios paquetes
MONTERROSO
Fíxose con catro paquetes dunha empresa de mensaxería e unha caixoneira que tiña unha caixa forte no seu interior
17 abr 2024 . Actualizado á 18:43 h.As imaxes dunha cámara de seguridade foron vitais para poder deter a un ladrón que forzou a porta dunha administración de Correos para entrar a roubar. A Comandancia da Garda Civil de Lugo anunciou este mércores o arresto dun veciño de Lalín (Pontevedra), de 32 anos de idade, como suposto autor dun roubo con forza perpetrado o pasado mes de febreiro nunha oficina de Correos da localidade lucense de Monterroso.
Segundo a información facilitada pola Comandancia de Lugo, o detido supostamente rebentou a pechadura da porta de entrada á oficina, cando estaba pechada, e accedeu ao seu interior.
Un importante botín
Unha vez dentro, fíxose con catro paquetes dunha empresa de mensaxería e unha caixoneira que tiña unha caixa forte no seu interior.
A Garda Civil iniciou unha investigación que rematou coa detención do sospeitoso, que vestía a mesma roupa e o calzado que supostamente levaba o día que perpetrou o roubo.
Os responsables da investigación conseguiron recuperar parte dos efectos roubados. O home detido foi posto ao dispor do Xulgado de Instrución de Chantada.