A reapertura desta rúa de Lugo será en breve e crece así a zona peonil no barrio
07 may 2025 . Actualizado á 10:52 h.Nuns días rematarán os últimos retoques das obras de reforma integral da rúa Carril dos Loureiros, en Lugo cidade, que quedará aberta ao tráfico só para residentes, carga e descarga e para o paseo dos lucenses.
O tenente de alcalde e concelleiro de Mobilidade, Rubén Arroxo, acompañado co concelleiro de Infraestruturas Urbanas, Alexandre Penas, reuníronse na tarde do martes cos veciños desta rúa, no barrio de Recatelo, para facer un seguimento das obras e explicarlles como quedará a nova reordenación do tráfico na zona.
Durante o encontro, Arroxo informou da inminente finalización dos traballos e detallou o modelo de mobilidade que se implantará unha vez reabra o Carril dos Loureiros. O modelo consiste nunha plataforma única de preferencia peonil e velocidade limitada, con acceso restrinxido a vehículos de residentes, carga e descarga e servizos de emerxencia. «Isto garante a seguridade das persoas, reduce o tráfico innecesario e mellora a calidade de vida e o descanso da veciñanza», explicou o concelleiro nacionalista.
Entre as medidas de control do tráfico, instalarase un lector de matrículas no punto de encontro entre a Rúa Recatelo e o Carril dos Loureiros, que permitirá o acceso unicamente a persoas residentes e servizos previamente autorizados. Pola súa banda, no outro extremo, no cruzamento entre Carril dos Loureiros e a Rúa Vilalba permitirá a entrada de residentes, servizos e vehículos de emerxencia sen necesidade de control automatizado mediante lector de matrículas.
Rubén Arroxo expuxo aos veciños que ambos os puntos de entrada á rúa estarán debidamente sinalizados para garantir unha correcta interpretación das normas de acceso e facilitar a convivencia no novo modelo de mobilidade.
Arroxo puxo como exemplo da política de intervención urbana que están a aplicar nos barrios o caso do Carril dos Loureiros, onde ademais se aproveitou para cambiar todos os servizos e incluír melloras ambientais. «Recatelo convértese así nun modelo de barrio sostible e participativo, cun espazo público de calidade pensado para as persoas», sinalou o tenente de alcalde.
A intervención no Carril dos Loureiros, cun investimento de 367.346,38 euros, foi executada pola empresa Construcións Sanle SA.
Esta é unha nova obra no cambio de mobilidade que aplica o goberno local. A área que dirixe Arroxo xa ten, entre outras intervencións, en proceso administrativo unha reforma parecida na Rúa Milagrosa, que dá continuidade á Rúa Luís Seoane, e a reforma da pasarela na parte alta do Carril dás Flores.