A estrutura de ferro aproveitable será sometida a unha profunda revisión
10 may 2019 . Actualizado ás 05:00 h.Concluír a biblioteca da Piringalla, despois de máis dunha década de tramitación, non é tarefa doado. Desde o Taller de Arquitectura MOMA, que foi quen elaborou o proxecto técnico para a conclusión da obra, aseguran que a estrutura actual non se axusta á contemplada no proxecto modificado e é necesario adaptala á normativa actual vixente. Aínda cando o obxectivo inicial foi o de aproveitar ao máximo o xa executado, iso non será posible na súa totalidade. «Para adaptarnos á nova aliñación deberase derrubar parte da estrutura e cimentación xa construída», indica a memoria descritiva do proxecto técnico elaborada polo citado estudo lucense.
«Desde a redacción do proxecto orixinal ata agora, o Código Técnico da Edificación (CTE) cambiou (...) facéndose máis restritivo e esixente, polo que se realizaron cambios na definición da envolvente ata o punto de cambialo por completo no volume principal do edificio», din desde o estudo. A solución adoptada, advirten, cambia totalmente a concepción orixinal do inmoble.
Apuntan os autores que entre 2010 e 2011 foron realizadas 14 probas de resistencia do formigón, pero será necesario efectuar novos controis antes de renovar a obra. Ademais, a estrutura metálica que sirva terá que ser sometida a un rigoroso estudo para coñecer o seu estado.
A adaptación do inmoble á nova aliñación motivou unha modificación na distribución e, á súa vez, unha pequena redución nas superficies útiles. «O cambio de aliñación lévanos a unha modificación estrutural para o que se elixiu un sistema eficaz e moi expresivo esteticamente. Trátase dunha cercha triangulada que destaca ao estar situada no exterior do edificio. Serve de soporte ao inmoble na fachada cara á rúa Vázquez Queipo e prolóngase pola planta baixa da fachada norte cara á gardería, cunha función estrutural secundaria», expresa a memoria descritiva. As obras teñen un prazo de 18 meses.