Sergi García (Palma de Mallorca, 1997) ten máis noivas. O Valencia Basket estuda desde hai semanas un acomodo para a súa base a través da fórmula da cesión, pero ademais do Breogán habería outros seis equipos interesados. Os celestes terían mostrado o seu interese en canto os laranxas confirmaron que lle buscaban sitio, querían agardar a mediados de decembro a que finalizase a Eurocup. Entre os interesados polo director de xogo estarían o Manresa e o Obradoiro, dous equipos con problemas nesa posición.
O club valenciano ve con bos ollos o seu posible chegada a Lugo, un destino que lle faría crecer como xogador. Entenden que García acumularía minutos de calidade cos de Natxo Lezkano, aínda que antes queren consultar ao base para coñecer os intereses do propio xogador. Ademais da súa opinión, será determinante o tema económico. Os celestes terán que facer un esforzo neste sentido se queren levar o gato á auga e acceder ao baloncestista mallorquino. A procura dun aleiro para substituír a Tarence Kinsey naufragou precisamente porque desde o Pazo non se puido a negociar ao prezo do mercado.
A recuperación do base francés Antoine Diot, lastrado no arranque da tempada por problemas de xeonllo, sería o que motivou ao Valencia a deixar marchar a Sergi García, que podería quedar sen sequera os minutos residuais que está a gozar no equipo de Jaume Ponsarnau.