A circulación non se viu interrompida xa que quedou sobre a mediana
26 feb 2024 . Actualizado ás 15:17 h.Un camión bañeira cargado de gran envorcou á primeira hora desta tarde na Autovía do Noroeste (A-6) ao seu paso polo municipio lucense de Guitiriz .
Segundo a información facilitada polo 112, o sinistro produciuse sobre as 12.56 horas, á altura da parroquia de Trasparga.
O Subsector de Tráfico da Garda Civil informou de que a circulación pola autovía non chegou a estar interrompida, dado que o camión quedou envorcado sobre a mediana.
En canto ao condutor do camión, aínda que presentaba unha ferida na cabeza, logrou saír polos seus propios medios da cabina. Particulares que foron testemuñas do accidente informaron ao 061 e ao 112.
A central de urxencias mobilizou aos Bombeiros de Vilalba, ao GES de Friol, á Garda Civil de Tráfico, á Policía Local e á agrupación de voluntarios de Protección Civil.
Tamén foi mobilizado persoal de mantemento da autovía, para limpar o firme da autovía, que quedou manchado a causa do sinistro.